लखनऊ : लग्न लागायला थोडा वेळ बाकी होता, नवरदेवाचा मूड अचानक बदलला आणि भर मंडपातून नवरदेव पळाला, हे बघताच नवरीने स्वत:हून पुढाकार घेत जवळपास २० किमी पर्यंतचा पाठलाग करून त्याला पकडलं, परत लग्न मंडपापर्यंत घेऊन आली आणि परत थाटामाटाल लग्न लागलं. अशी लग्नाची स्टोरी आपण पहिल्यांदाच ऐकत असाल. आपल्याला पहिल्यांदा ऐकल्यानंतर यावर विश्वास बसणार नाही. पण ही घटना उत्तरप्रदेशमध्ये घडली आहे.

नवरदेव मंडपातून पळून गेल्याचं नवरीला समजाच ती बचैन झाली. तिने नवरदेवाला शोधून आणण्याचा निश्चय केला आणि ती बाहेर पडली. तब्बल २० किलोमीटर पाठलाग केल्यानंतर एका बसमध्ये तिने नवरदेवाला पकडलं आणि लग्न मंडपापर्यंत घेऊन आली आणि त्याच नवरदेवासोबत या नवरीचे लग्न लागले. हा थरार तब्बल दोन तास चालू होता.

अधिक माहितीनुसार, बरैली येथील जुने शहर परिसरात राहणारी मुलगी आणि बिसौली बदायू येथील मुलाचे प्रेम प्रकरण मागच्या अडीच वर्षापासून सुरू होतं. यादरम्यान ही माहिती त्यांच्या घरच्यांना समजली. घरच्यांनी काही करण्याअगोदर त्यांनीच लग्न करण्याचा प्लॅन बनवला.

सोमवारी मुलीच्या कुटुंबियांनी बरैली येथील रामनगर रोडला लागून असलेल्या भूतेश्वरनाथ मंदिरात लग्नाची तयारी केली होती. पण लग्नाच्या वेळी नवरदेवाचा मूड बदलला आणि तो लग्नमंडपातून फरार झाला होता. त्यानंतर नवरीनेच त्याला पकडून आणलं आणि लग्न लावून घेतलं.