तुम्ही जर सोशल मीडियावर अ‍ॅक्टिव्ह असाल, तर Look Between H and L on your keyboard अशा प्रकारचा ट्रेंड तुम्ही नक्कीच पाहिला असेल. अवघ्या एक ते दोन दिवसांमध्येच या ट्रेंडचे शेकडो मीम्स तयार झाले आहेत. मात्र, हा ट्रेंड नेमका कुठून सुरू झाला हे अगदी कमी लोकांना माहिती आहे.

काय आहे ट्रेंड?

सोशल मीडियावर सध्या असे मीम्स व्हायरल होत आहेत, ज्यामध्ये यूजर्सना त्यांच्या कीबोर्डवरील अक्षरं पाहण्यास सांगण्यात येत आहे. यूजर्सना ठराविक दोन अक्षरांच्या मधली अक्षरं पाहण्यास सांगण्यात येतं. या अक्षरांमध्ये काही छुपा अर्थ असतो, ज्यामुळे तो संपूर्ण मीम समजतो. म्हणजेच कुणी H आणि L च्या मध्ये पाहण्यास सांगितलं, तर JK ही अक्षरं दिसतात. याचा अर्थ 'जस्ट किडिंग' असा होतो.

तीन वर्षे जुना ट्रेंड

खरंतर हा ट्रेंड आत्ताचा नाही, तर तीन वर्षे जुना आहे. 4Chan या इमेज बेस्ड वेबसाईटवर 2021 साली असा मीम पहिल्यांदा शेअर करण्यात आला होता. या मीमचा संबंध K-On या अ‍ॅनिमे सीरीजशी होता. यामध्ये आपल्या कीबोर्डच्या T आणि O या अक्षरांच्या मध्ये पाहण्यास सांगण्यात आलं होतं. या दोन अक्षरांच्या मध्ये YUI ही अक्षरं येतात. हे या सीरीजमधील एका कॅरेक्टरचं नाव होतं.

सोशल मीडियावर आता हा ट्रेंड परत एकदा व्हायरल होतो आहे. कित्येक मोठमोठे ब्रँड्स देखील अशा प्रकारच्या पोस्ट करत आहेत. यामुळे हा मीम ट्रेंड अगदी वेगाने लोकप्रिय झाला आहे. अगदी दिल्ली पोलिसांनी देखील यामध्ये उडी घेतली आहे.

गिनिज वर्ल्ड रेकॉर्ड्स या एक्स हँडलवरुन देखील अशा प्रकारची पोस्ट करण्यात आली आहे. सोशल मीडियावर कित्येक यूजर्स दोन-तीन दिवसांमध्येच या ट्रेंडला वैतागले देखील आहेत. हा ट्रेंड बास करा, आताच वैताग आला अशा आशयाच्या कित्येक पोस्ट देखील एक्स आणि इन्स्टाग्रामवर पहायला मिळत आहेत.