लखनऊ : उत्तरप्रदेश येथील एका मुलाने आपल्या प्रेयसीच्या भावी नवऱ्याला जाहीर धमकी दिल्याची घटना घडली आहे. प्रेयसीच्या घराच्या जवळ त्याने धमकी दिल्याची चिठ्ठी सापडली असून ही चिठ्ठी सोशल मीडियावर प्रचंड व्हायरल होत आहे. तर याप्रकरणी पोलिसांनी गुन्हा दाखल केला असून अधिकचा तपास सुरू आहे.

हेही वाचा - भारतीय क्रिकेटची नवी आशा- पृथ्वी शाॅ

दरम्यान, उत्तरप्रदेशमधील हापूड येथील ही घटना असून एका प्रियकराने आपल्या करिश्मा नावाच्या प्रेयसीचं लग्न ठरलं म्हणून तिच्या भावी नवऱ्याला जीवे मारण्याची धमकी दिली आहे. त्याने चिठ्ठीवर लिहून धमकी दिली असून चिठ्ठीत लिहिलंय की, "कान उघडे ठेवून ऐक नवरदेव मोन्टू सिंह, वरात घेऊन नको येऊ, नाहीतर जिवंत राहणार नाहीस.

मी सगळ्या वरातीला स्मशान बनवून टाकेल. ज्या लोकांना या भावाच्या पार्टीत गोळ्या खायच्या असतील त्यांनीच या वरातील यावे. हा फक्त ट्रेलर आहे संपूर्ण फिल्म वरातीत दिसेल." असं आरोपीने चिठ्ठीत लिहिलं आहे.

अशा प्रकारची धमकी दिल्यामुळे वातावरणात भिती पसरली असून यासंदर्भात पोलिसांत तक्रार दाखल करण्यात आली आहे. त्याचबरोबर पोलिसांनी या तरूणाचा शोध घेण्यासाठी तपास सुरू केल्याची माहिती आहे.