पुणे शहरासह संपूर्ण जिल्ह्यात बुधवारी मध्यरात्रीपासून पावसाची जोरदार बॅटींग सुरु आहे. गुरुवारी पहाटेपासूनच पुण्यात पावसाने अधिकच जोर धरला. मेघगर्जनेसह तुफान पाऊस झाल्याने शहरातील अनेक रस्ते पाण्याखाली गेले आहेत. त्यामुळे जनजीवन विस्कळीत झालंय.

अशातच एका शाळेच्या व्हॅनवर भलं मोठं झाड कोसळल्याची घटना घडली. या घटनेचा धक्कादायक व्हिडीओ समोर आला आहे.

मिळालेल्या माहितीनुसार, शाळेच्या व्हॅनवर आणि रस्त्याने जाणाऱ्या एका दुचाकी चालकाच्या अंगावर एक मोठे झाड कोसळले. वडगाव शेरी येथील आनंद पार्क मध्ये आज सकाळी ही घटना घडली.

सुदैवाने या दुर्घटनेत कोणीही जखमी झाले नाही, पण दोन वाहनांचे मोठं नुकसान झालं आहे.

पुण्याच्या जिल्हाधिकाऱ्यांनी सर्व शाळा तसेच महाविद्यालयांना सुट्टी जाहीर केली आहे. यासोबतच पुणे शहर, पिंपरी चिंचवड भागातील कार्यालये व इतर अस्थापनांना सुटी देण्याचे निर्देश जिल्हाधिकारी सुहास दिवसे यांनी दिले आहेत.