मुंबई : मुंबई लोकल म्हणजे मुंबईकरांचा आत्मा म्हणता येईल. दररोज करोडो लोकं लोकलमधून प्रवास करत असतात. पण या प्रवासात रोज कित्येक घटना घडतात. काही वाईट, दुर्दैवी तर काही माणुसकी दाखवणाऱ्या असतात. सध्या असाच एका घटनेचा व्हिडिओ सोशल मीडियावर व्हायरल झाला आहे.

व्हायरल होत असलेला व्हिडिओ बोरिवली रेल्वे स्टेशनवरील आहे. तिथे एका आजारी महिलेला पोलीस अधिकारी उचलून रेल्वेच्या डब्याजवळ नेताना दिसत आहे. आरपीएफचे सहाय्यक उपनिरीक्षक मान सिंग असं त्यांचं नाव असून व्हील चेअर उपलब्ध नसल्यामुळे त्यांनी थेट महिलेला आपल्या हाताने उचलून दुसऱ्या डब्यापर्यंत नेले. हा प्रकार शुक्रवारी रात्री घडला.

दरम्यान, हा व्हिडिओ सध्या सोशल मीडियावर चांगलाच व्हायरल झाला असून त्यावर नेटकऱ्यांनी आपल्या कमेंट केल्या आहेत. नेटकऱ्यांनी या पोलीस अधिकाऱ्याचं कौतुक केलं असून या व्हिडिओला पसंती दर्शवली आहे. ट्वीटरवर शेअर करण्यात आलेल्या या व्हिडिओला अनेकांनी शेअर केलं आहे.