महिंद्रा उद्योग समुहाच्या आनंद महिंद्रा यांनी काल (रविवारी) एक व्हिडिओ शेअर केला आहे. ट्रकमध्ये उभारलेल्या एका एसी मंगल कार्यालयाचा व्हिडिओ त्यांनी शेअर केला आहे. मला हे तयार करणाऱ्या व्यक्तीला भेटायचे आहे असं महिंद्रा यांनी आपल्या ट्वीटमध्ये म्हटलं आहे. त्यानंतर महाराष्ट्रातील व्यक्तीचा हा व्हिडिओ सोशल मीडियात प्रचंड व्हायरल होत आहे.

(Anand Mahindra Viral Tweet)

व्हायरल होत असलेला व्हिडिओ हा महाराष्ट्रातील लातूर येथील असल्याचं समोर आलं आहे. दयानंद दरेकर असं या व्यक्तीचं नाव असून लॉकडाऊन मध्ये अनेक लोकांचे व्यवसाय डबघाईला गेल्यावर त्याने हा नवीन व्यवसाय सुरू केला होता. त्यानंतर त्याने महाराष्ट्रभर हा व्यवसाय करण्यास सुरूवात केल्याचं त्याने सांगितलं आहे.

दरम्यान, कोरोनामुळे अनेकांच्या नोकरी आणि व्यवसायावर गदा आली होती. त्यानंतर अनेकांनी आपले नवे व्यवसाय आणि नोकऱ्या सुरू केल्या. त्यामध्ये दयानंद दरेकर यांनी मोबाईल हॉलचा व्यवसाय सुरू केला. त्यांनी यासाठी जुन्या ट्रकचा वापर केला असून या मोबाईल हॉलमध्ये जवळपास दोनशे लोकं बसत असल्याचा दावा त्यांनी केला आहे.