चेन्नई- डॉक्टरांच्या वार्षिक परिषदेदरम्यान महिलेचा डान्स परफॉर्मन्स आयोजित करण्यात आल्यावरून चर्चेला तोंड फुटलं आहे. याप्रकरणी एक व्हिडिओ सोशल मीडियावर व्हायरल होत आहे. ५८ सेकंदाच्या या व्हिडिओमध्ये एक महिला डान्सर असोसिएशन ऑफ कोलन आणि रेक्टल सर्जन ऑफ इंडियाच्या वार्षिक परिषदेमध्ये उपस्थित डॉक्टरांचे मनोरंजन करताना दिसत आहे.

सदर व्हिडिओ व्हायरल झाल्यानंतर यावरून चर्चांना सुरुवात झाली आहे. काहींनी अशा प्रकारच्या आयोजनाचा निषेध केला आहे, तर काहींनी या सर्व प्रकाराचे समर्थन केले आहे. व्हिडिओमध्ये दिसतंय की, काही डॉक्टर हातामध्ये ड्रिंक घेऊन महिला डान्सरसोबत नाचत आहेत. एका युझरने यासंदर्भातील व्हिडिओ पोस्ट केला असून अशा प्रकाराबाबत नाराजी व्यक्त केली आहे.

युझरने म्हटलंय की, असोसिएशन ऑफ कोलन आणि रेक्टल सर्जन ऑफ इंडियाची ही वार्षिक परिषद आहे. चेन्नई येथे १९ सप्टेंबर ते २१ सप्टेंबरदरम्यान ही परिषद भरवण्यात आली होती. @IMAIndiaOrg कडून मला जाणून घ्यायचंय की हे काय मानवी शरीरशास्त्रासंबंधी ट्रेनिंग आहे का? वयस्कर डॉक्टर महिलेला ओढत आहेत. ही एक प्रकारची मेडिकल प्रॅक्टिस आहे का?

काहींनी परिषदेमधील नाचगाण्याच्या कार्यक्रमाचे समर्थन केले आहे. काही युझर्संनी म्हटलं की, अशा प्रकारचा डान्स आपण बॉलिवूडमध्ये पाहतच असतो. शिवाय, अनेक कार्यक्रमांमध्ये असा डान्सचा शो आयोजित केला जातो. अशा प्रकारचा डान्स आपण लाखवेळा पाहिला आहे. डॉक्टर महिलेला ओढत आहेत, असं मुळीच वाटत नाही.

डान्सर महिलेच्या संमतीने हे सर्व सुरु आहे. काहीच दिवसांपूर्वी अमेरिकेमध्ये आपल्या विश्वगुरूंचे मनोरंजन करण्यासाठी काही महिला नाचवण्यात आल्या होत्या. आपल्या डॉक्टरांचे देखील मनोरंजन होऊ नये का? ते देखील आपल्यासारखे व्यक्ती आहेत, असं एका युझरने म्हटलं.