भारतातील लग्न म्हटलं की त्यात काही ना काही सीन होतातच. बऱ्याच वेळा लग्नातील भांडणांचे व्हिडिओ सोशल मीडियावर व्हायरल होत असतात. बरं ही भांडणं नातेवाईकांमधील असेल तर तरी ठीक. पण जर नवरीचा जुना प्रियकरच मांडवात पोहोचला आणि राडा घालू लागला तर?

अशाच एका घटनेचा व्हिडिओ सध्या सोशल मीडियावर व्हायरल होतो आहे. या व्हिडिओमध्ये दिसतंय, की एक व्यक्ती एका लग्नात पोहोचून नवरीला आपल्यासोबत येण्याची विनवणी करत आहे. या व्यक्तीचा संताप आपल्याला त्याच्या चेहऱ्यावरुन आणि बोलण्यातून दिसून येतोय.

"तू समाजाची पर्वा करू नको काजल, मी तुझ्यावर खरं प्रेम करतो. तूही माझ्यावर प्रेम करतेस ना?" असं ही व्यक्ती मंडपात फेऱ्यांच्या तयारीत असलेल्या नवरीला म्हणत असल्याचं या व्हिडिओत दिसतंय.

नवरीचा ओळखण्यासही नकार

एकीकडे ही व्यक्ती स्वतःला नवरीचा प्रियकर म्हणवत असताना, नवरीने मात्र या व्यक्तीला ओळखण्यासही नकार दिला. "प्रेम करणं सोडच, मी तर तुला ओळखतही नाही. तू इथून निघून जा." असं ही नवरी या व्यक्तीला म्हणते.

या सगळ्यात नवरदेव मात्र या दोघांची भांडणं पाहतच राहतो. या दोघांच्या मध्ये बोलावं की नाही या विवंचनेत हा नवरदेव असल्याचं व्हिडिओत स्पष्ट दिसून येतंय.

स्क्रिप्टेड व्हिडिओ

दरम्यान, हा व्हिडिओ स्क्रिप्टेड असल्याचा अंदाज व्यक्त करण्यात येतोय. वेडिंगवर्ल्ड पेज या इन्स्टाग्राम हँडलने हा व्हिडिओ पोस्ट केला आहे. हा व्हिडिओ फेक असला, तरी वास्तविक जीवनातही मुलं आणि मुली असं करू शकतात, अशा आशयाच्या प्रतिक्रिया कमेंट्समध्ये दिसून येत आहेत. यामध्ये कोण बरोबर आणि कोण चूक याबद्दलही कित्येक नेटकरी वाद घालताना दिसत आहेत.