नवी दिल्ली: केंद्रीय अर्थमंत्री निर्मला सीतारमण (Nirmala Sitharaman) यांनी आज संसदेत २०२२ चा अर्थसंकल्प (Union Budget 2022) ठेवला. या अर्थसंकल्पात त्यांनी भारतीय रेल्वेसाठी महत्वाची घोषणा केली. (Railway Budget 2022 News Updates) त्यांनी नव्या ४०० वंदे भारत ट्रेन्सची घोषणा केली. याचबरोबर देशातील विविध शहरात मेट्रोचं जाळं वाढवणार असल्याचीही घोषणा केली.

निर्मला सीतारमण आज कोरोनाच्या आर्थिक फटक्यातून सावरणाऱ्या रेल्वेसाठी (Indian Railway) काय घोषणा करणार याकडे सर्वांचे लक्ष होते. निर्माला सीतारमण यांनी आपल्या अर्थसंकल्पीय भाषणात रेल्वेबाबत मोठी घोषणा केली आहे. त्यांनी नव्या ४०० वंदे भारत ट्रेन्स (Vande Bharat Trains) सुरू करणार असल्याची घोषणा केली. याचबरोबर त्यांनी देशातील विविध शहरात त्यांच्या गरजेनुसार मेट्रोचं (Metro Railway) जाळं वाढवणार असल्याचही सांगितलं.

याचबरोबर अर्थमंत्र्यांनी दळणवळण क्षेत्रातील पायाभूत सुविधांसाठीही घोषणा केल्या आहेत. पुढील तीन वर्षात ४०० नव्या वंदेभारत ट्रेन्स तयार करणार तसेच २०२२-२३ दरम्यान राष्ट्रीय महामार्गांची लांबी २५०० किमीपर्यंत वाढवण्याची योजना आहे. रेल्वेची सुरक्षा आणि क्षमता वाढवण्यासाठी स्वदेशी कवच तंत्रज्ञानांतर्गत 2,000 किमी नेटवर्क उभारणार आहे.

यंदाच्या अर्थसंकल्पात रेल्वे, लहान शेतकरी आणि सुक्ष्म, मध्यम उद्योगांसाठी नवीन उत्पादने आणि कार्यक्षम लॉजिस्टिक सेवा विकसित केली जाणार आहे. तसेच टपाल आणि रेल्वे नेटवर्कच्या एकत्रीकरणात पुढाकार घेतला जाणार आहे. एक स्टेशन, एक उत्पादन ही संकल्पना राबवली जाणार आहे.