Nandurbar Agriculture News : आमोदा (ता. शहादा) शिवारात ११ एकर केळीच्या बागेवर शेतकऱ्याने मुंबई येथील विदेशी कंपनीचे उत्पादक असलेली रासायनिक फवारणी केल्यानंतर ३६ तासांनंतर केळीचा आकार एक फुटापर्यंत वाढून केळीबागांचे फवारणीमुळे मोठ्या प्रमाणावर नुकसान झाले.

यात सुमारे ७५ लाख रुपयांचा आर्थिक फटका शेतकऱ्याला बसला आहे.(Banana plantation destroyed by chemical spraying in nandurbar agriculture news)

या संदर्भात संबंधित शेतकऱ्याने विदेशी कंपनी तसेच तालुका कृषी अधिकारी, शहादा, जिल्हाधिकारी नंदुरबार यांच्याकडे तक्रारी दाखल केली आहे. मात्र संबंधित विभागांनी दुर्लक्ष केल्याचे शेतकऱ्याने म्हटले आहे. सध्या संपूर्ण जिल्ह्यातच अवकाळी पाऊसाने थैमान घातल्याने शेतकऱ्यांना नैसर्गिक संकटाचा वेळोवेळी सामना करावा लागत आहे.

त्यातच रासायनिक खते, फवारणी विक्री करणाऱ्या कंपनीकडून शेतकऱ्यांची अशी फसवणूक होत असल्याने शेतकरी मोठ्या आर्थिक कचाट्यात सापडला आहे. शहादा तालुक्यातील म्हसावद येथील रहिवासी महेंद्र पाटील यांची आमोदा शिवारात शेती असून, त्यांनी साडेअकरा एकरवर केळीची लागवड केली आहे.

१३ हजार ७०० केळीची झाडे असून, केळीची वाढ व्हावी यासाठी त्यांनी मुंबई येथील एका कंपनीचे रासायनिक फवारणीचे उत्पादन शहादा येथून विकत घेतले व त्यांच्या सांगितल्याप्रमाणे त्यांनी २४ नोव्हेंबर २०२३ ला केळी फळपिकावर फवारणी केली. फवारणीच्या ३६ तासांनंतर केळी बांगडीप्रमाणे गोल-वाकडी व लांब झाली.

अचानक वाढ झालेली केळीची ही वाढ तब्बल एक फुटापर्यंत गेल्याने संबंधित शेतकऱ्याचे मोठ्या प्रमाणावर आर्थिक नुकसान झाले आहे. ही बाब श्री. पाटील यांच्या लक्षात आल्यानंतर त्यांनी त्वरित संबंधित रासायनिक फवारणी कंपनीकडे तक्रार दाखल केली. संबंधित कंपनीने फवारणीचे नमुने घेतले असून, ते तपासणीसाठी प्रयोगशाळाकडे पाठविले आहेत.