Dhule Crime News : निमडाळे (ता. धुळे) येथे चोरट्यांनी एकाच रात्रीतून चार घरे फोडून रोकडसह लाखोंचा ऐवज लंपास केला. एका घरात तर सशस्त्र चोरट्यांनीच घाबरलेल्या व्यक्तीला माठातून पाणी आणून पाजले.

तुम्ही घाबरू नका, फक्त चाव्या द्या.. म्हणत कपाटातून पाच लाखांची रोकड काढून पोबारा केला. या घटनेमुळे गावात भीतीचे वातावरण आहे. (burglary 4 houses in night and looted lakhs dhule crime news)

निमडाळे येथील विठ्ठल भाऊराव साळुंखे परिवारासह बाहेरगावी होते. त्यामुळे घर बंद असल्याची संधी साधत चोरट्यांनी कडीकोयंडा तोडत सोन्याचे दागिने व रोकड लंपास केली. नंतर चोरट्यांनी भटू लकडू पाटील यांच्याकडे घरफोडी केली. चोरट्यांच्या हाती काहीच लागले नाही.

रवींद्र भिका पाटील यांचेही घर चोरट्यांनी फोडले. पुढे त्यांनी काशीनाथ विठ्ठल सूर्यवंशी यांच्या घराकडे मोर्चा वळविला.

सूर्यवंशी परिवारासह झोपलेले असताना चोरट्यांनी घरात शिरकाव केला. त्या वेळी सूर्यवंशी व त्यांच्या पत्नीला जाग आली. घरात सशस्त्र चोरटे पाहून सूर्यवंशी दांपत्य घाबरले.

चोरट्यांनीच सूर्यवंशी यांना माठातून पाणी आणून पाजले. ‘तुम्ही घाबरू नका, आम्हाला फक्त चाव्या द्या...’ असे सांगत चावी घेतल्यावर सूर्यवंशी यांच्या सांगण्यावरून कपाटातून पाच लाख २० हजारांची रोकड लंपास केली व चोरटे मागच्या दाराने पळाले. गावात एकाच रात्री चार ठिकाणी झालेल्या धाडसी चोरीमुळे भीतीचे वातावरण निर्माण झाले आहे. पश्‍चिम देवपूर पोलिस ठाण्याच्या पथकाने तपास सुरू केला आहे.