Dhule Crime News : वेहेरगाव (ता. साक्री) फाट्याकडून रायपूरबारीकडे जाणाऱ्या मार्गावर एका कारमधून होणारी बनावट मद्याची तस्करी एलसीबीच्या पथकाने उघड केली. या कारवाईत तीन लाख सहा हजार ८०० रुपयांचा मुद्देमाल जप्त केला. याप्रकरणी चार संशयितांपैकी तिघांना ताब्यात घेतले. एक जण फरारी झाला. एलसीबीचे पोलिस निरीक्षक श्रीराम पवार यांना वेहेरगाव फाट्यावरून रायपूरबारीकडे कारमधून (एमएच १९ सीएफ ४७३९) बनावट मद्याची तस्करी होत असल्याची माहिती मिळाली. ()

या अनुषंगाने पवार यांनी पथकास कारवाईची सूचना दिली. पथकाने वेहेरगाव फाटा ते रायपूरबारीदरम्यान नाकाबंदी करत पाळत ठेवली. गुरुवारी (ता.२०) रात्री साडेनऊच्या सुमारास उपरोक्त संशयित कार येताना पथकाच्या निदर्शनास आली. वाहनाला थांबवून तपासणी केली असता एक लाख ८०० रुपयांचा बनावट मद्यसाठा आढळला. कारवाईत बनावट मद्यासह दोन लाख रुपयांची कार, सहा हजारांचे दोन मोबाईल, असा एकूण तीन लाख सहा हजार ८०० रुपयांचा मुद्देमाल पथकाने जप्त केला.

याप्रकरणी योगेश जगताप यांच्या फिर्यादीवरून रज्जाक सिकंदर पटवे (रा.भोई गल्ली, साक्री), महेंद्र शिवाजी चौधरी (रा. शिवाजीनगर, साक्री), रावसाहेब कारभारी अहिरे (रा. कासारे, ता. साक्री), श्रीराम बाबर (रा. साक्री) या संशयितांवर विविध कलमान्वये निजामपूर पोलिस ठाण्यात गुन्हा दाखल झाला. यातील श्रीराम बाबर हा फरारी आहे. उर्वरित तिघांना पथकाने ताब्यात घेतले. पोलिस अधीक्षक श्रीकांत धिवरे, अपर पोलिस अधीक्षक किशोर काळे यांच्या मार्गदर्शनाखाली एलसीबीचे पोलिस निरीक्षक श्रीराम पवार, योगेश राऊत, धनंजय मोरे, संजय पाटील, चेतन बोरसे, तुषार सूर्यवंशी, योगेश जगताप यांनी ही कारवाई केली.