धुळे : नरडाणा (ता. शिंदखेडा) पोलिसांनी सिनेस्टाईल पाठलाग करत गांजाची तस्करी रोखली. याप्रकरणी उस्मानाबादच्या दोघांना अटक केली. त्यांच्याकडून पिंपरी-चिंचवड पासिंगच्या कारमध्ये दोन लाखांचा गांजा आढळला. गांजासह कार, असा सात लाखांचा मुद्देमाल जप्त केला आहे. याप्रकरणी गुन्हा दाखल केला.

नरडाणा पोलिस ठाण्याचे सहाय्यक पोलिस निरीक्षक चंद्रकांत पाटील पथकासह गुरुवारी (ता. २२) सायंकाळी साडेपाचच्या सुमारास पेट्रोलिंग करत असताना एक पांढऱ्या रंगाची कार (एमएच १४ सीएक्स ९००७) शिरपूरकडून धुळ्याकडे गांजाची वाहतूक करीत असल्याची माहिती मिळाली. त्यानुसार ते मुंबई-आग्रा महामार्गावरील माळीच पोलिस चौकी येथे थांबले. तेव्हा संशयित कार वेगाने धुळ्याच्या दिशेने जाताना दिसली.

पोलिस पथकाने वाहनाचा पाठलाग केला. माळीच चौकीच्या पुढे वाहनाला पकडण्यात आले. मग दोघांना ताब्यात घेतले. रमेश चांगदेव मुरूमकर व युवराज यशवंत पवार (रा. तीत्रंज, ता. भूम, जि. उस्मानाबाद), अशी त्यांची नावे आहेत. तपासणीत २४ किलो ६९० ग्रॅम गांजासदृश्य अमली पदार्थ मिळून आला. त्याची किंमत एक लाख ९७ हजार ५२० रुपये आहे.

गांजा व सुमारे पाच लाखांचे वाहन, असा सहा लाख ९७ हजार ५२० रुपयांचा मुद्देमाल जप्त केला. ही कारवाई पोलिस अधीक्षक संजय बारकुंड, अपर पोलिस अधीक्षक किशोर काळे, उपविभागीय पोलिस अधिकारी दिनेश आहेर यांच्या मार्गदर्शनाखाली नरडाणा पोलिस ठाण्याचे सहाय्यक पोलिस निरीक्षक चंद्रकांत पाटील, भूषण खेडवन, श्री. माळी, भरत चव्हाण, विनोद कोळी व रवींद्र महाले यांच्या पथकाने केली.