Dhule News : शहरातील महात्मा गांधी चौकाजवळील एका कापड दुकानाला रविवारी (ता. १०) रात्री साडेदहाच्या सुमारास भीषण आग लागली. महापालिकेच्या अग्निशमन बंबांनी आग आटोक्यात आणली. सुदैवाने घटनेत कुठलीही जीवितहानी झाली नाही. दरम्यान, प्राथमिक माहितीनुसार आगीत ५० ते ६० लाखांचे नुकसान झाल्याचा अंदाज आहे. (dhule Damage estimated at 50 lakhs to cloth shop in severe fire marathi news)

शहरातील आग्रा रोडवरील कृष्णदीप अमरकला ड्रेसेस हे कापड दुकान आहे. त्यास रविवारी रात्री साडेदहाच्या सुमारास आग लागली. आगीने काही वेळातच रौद्ररूप धारण केले. मुख्य बाजारपेठेत दुकान असल्याने एकच धावपळ उडाली. महापालिकेच्या अग्निशामक दलाच्या दोन बंबांनी आग आटोक्यात आणली. शॉर्टसर्किटने आग लागल्याचे प्रत्यक्षदर्शींनी सांगितले. (latest marathi news)

अग्निशामक दलाचे अधिकारी व लीडिंग फायरमन राजन महाले, वाहनचालक प्रशांत मुर्तडक, सिद्धार्थ खैरनार, धनंजय खैरनार, नीलेश सोनवणे, सुभाष गायकवाड, फायरमन किरण साळवी, योगेंद्र जाधव, अमोल सोनवणे, कुणाल ठाकूर, पांडुरंग पाटील आदी कर्मचाऱ्यांनी आग आटोक्यात आणली.

घटनास्थळी माजी आमदार प्रा. शरद पाटील यांच्यासह पोलिस अधिकाऱ्यांनी भेट देऊन पाहणी केली. दरम्यान, आगीत अंदाजे ५० ते ६० लाखांचे नुकसान झाल्याचे दुकान मालक कीर्तिविजय कुमार रेलन यांनी सांगितले.