लामकानी : गणेश विसर्जनाच्याच दिवशी तीन वर्षांपूर्वी मुलाचा अपघाती मृत्यू झाला होता. मंगळवारी (ता. १७) अशाच घटनेची पुनरावृत्ती होत आईचा अपघातात मृत्यू झाल्याने संपूर्ण गावात हळहळ व्यक्त होत आहे. बेबीबाई दिलीप बागूल (४८) असे महिलेचे नाव आहे.

तीन वर्षांपूर्वी बेबीबाईंचा लहान मुलगा राजेंद्र याचा गणेश विसर्जनाच्या दिवशी दुचाकी अपघातात मृत्यू झाला होता. बेबीबांईचाही अपघातात मृत्यू झाल्याने बागूल परिवारासह संपूर्ण गाव शोकसागरात बुडाले. (Death of Lamkani woman who injured in accident)

बेबीबाई ९ सप्टेंबरला दुसानेहून अंत्ययात्रा करून लामकानी येथे परत येत असताना म्हसाळे (ता. साक्री) गावाच्या एक किलोमीटर आधी शनिमंदिराजवळ तोल जाऊन त्या दुचाकीवरून पडल्याने डोक्याला मार लागला होता. त्यांच्यावर धुळे येथे उपचार सुरू होते. गणेश विसर्जनाच्या दिवशी पहाटे पाचला उपचारांदरम्यान मृत्यू झाला.

बागूल परिवारात चौथा अपघाती मृत्यू असून, यापूर्वी बेबीबाईंचे जेठ दुर्योधन बागूल आणि दीर शांताराम बागूल यांचेही अपघाती निधन झाले. बेबीबाई या दिलीप बागूल यांच्या पत्नी, धुळे शहरातील विकास विद्यालयाचे संचालक शिवाजी बागूल व दादाभाई बागूल यांच्या भावजयी, विजय बागूल यांच्या आई, तर भाजपचे कार्यकर्ते सोनू बागूल यांच्या काकू होत.