सोनगीर : मुंबई-आग्रा महामार्गाच्या वाघाडी फाटा ते बाभळे फाटादरम्यान काही ठिकाणी महामार्ग कोरून ठेवला आहे. दीड महिना होऊनही टोलप्लाझा व महामार्ग प्राधिकरण विभागाच्या दुर्लक्षामुळे त्याची दुरुस्ती होत नाही. उखडलेल्या मार्गावर दुचाकी चालविणे कठीण असल्याने दररोज अपघात होत आहेत. या पार्श्वभूमीवर त्वरित महामार्गाची दुरुस्ती व्हावी, अशी मागणी आहे. सोनगीर ते बाभळे फाटादरम्यान महामार्ग दुरुस्तीच्या नावाखाली ठेकेदाराने ठिकठिकाणी मार्ग उखडून ठेवला आहे. (Dhule Highway dug in Songir is fatal)

लवकर दुरुस्त होत नसल्याने वाहनधारकांना विशेषतः दुचाकीस्वारांना उखडलेला भाग अपघाताला आमंत्रण देणारे ठरत आहे. दुचाकी घसरून अपघातांचे प्रमाण दररोज सरासरी एक झाले आहे. शुक्रवारी डांगुर्णे (ता. शिंदखेडा) येथील अधिकराव जयराम पाटील दुचाकीसह घसरून पडले. मागे बसलेला त्यांचा मुलगा निखिल अधिकराव पाटील (वय १७) याच्या डोक्याला गंभीर दुखापत झाली.

त्याला येथील ग्रामीण रुग्णालयात प्राथमिक उपचारानंतर जिल्हा रुग्णालयात दाखल केले आहे. धुळ्यातील ज्येष्ठ पत्रकार गो. पी. लांडगे या मार्गाने जात असताना त्यांच्या पुढील दुचाकीस्वार घसरून जखमी झाला. श्री. लांडगे यांनी त्याला सावरले.

पाणी व प्राथमिक उपचाराची व्यवस्था केली आणि उखडलेल्या मार्ग दुरुस्तीबाबत आवाज उठविण्याचे आवाहन केले. उखडलेला मार्ग ताबडतोब दुरुस्तीसह डांबरीकरण करावा अन्यथा आंदोलन करण्यात येईल, असा इशारा ग्रामस्थांनी दिला.