चिमठाणे : शिंदखेडा तालुक्यात यंदा पावसाची मेहेरनजर असल्याने खरीप हंगामातील पिके डोलू लागली होती. तालुक्यात नगदी पीक म्हणून कापसाची ७१ हजार ५०० हेक्टर क्षेत्रावर बागायती व जिरायती लागवड करण्यात आली आहे. कापसावर लाल्या रोगाचा प्रादुर्भाव झाला असताना, लगेच बागायती कापसाची वेचणी सुरू असल्याने कापसात गुलाबी बोंडअळी आढळल्याने शेतकरी हवालदिल झाला आहे. शिंदखेडा तालुक्यात सतत गेल्या तीन वर्षांपासून दुष्काळ परिस्थिती होती. (Infestation of Lal Ya Gulabi on cotton threatens crop of 71 thousand 500 hectares in Shindkheda )

यंदाच्या खरीप हंगामाच्या सुरुवातीपासून मॉन्सूनची मेहेरनजर असल्याने तालुक्यात मृग नक्षत्रात कापूस, मका पिकांची लागवड व बाजरी, मूग, ज्वारी, भुईमूग, सोयाबीन आदी पिकांची पेरणी करण्यात आली होती. मृगाचे पीक जास्त पावसामुळे वाया गेले, तर काही ठिकाणी कापूस व मका पिकांतील शेतात जास्त पावसामुळे पाणी साचल्याने पिके पिवळे पडल्याने वाया गेले होते.

लाल्या-गुलाबी बोंडअळीचा हल्ला

शिंदखेडा तालुक्यात बागायती व जिरायती कापूस पिकाची ७१ हजार ५०० हेक्टरवर लागवड करण्यात आली होती. गेल्या महिन्यात लाल्या रोगाचा प्रादुर्भाव झाल्यानंतर आता बागायती कापूस वेचणीच्या वेळी गुलाबी बोंडअळीचा मोठ्या प्रमाणावर हल्ला दिसून आल्याने शेतकरी हवालदिल झाला आहे. यंदा चांगला मॉन्सून होऊनही शेतकऱ्यांच्या हातातून खरीप हंगाम गेला आहे. (latest marathi news)

कृषी विभागाने उपाययोजना कराव्यात

तालुक्यातील कापूस पिकावर लाल्या रोगासह गुलाबी बोंडअळीचा होत असलेल्या प्रादुर्भावबाबत कृषी विभागाच्या तज्ज्ञांनी बांधावर जाऊन उपाययोजना कराव्यात. जिरायती कापसावर बोंडअळीचा प्रादुर्भाव रोखण्यासाठी कृषी विभागाने काहीतरी उपाययोजना करून मोफत कीटकनाशक उपलब्ध करून द्याव्यात, अशी मागणी शेतकऱ्यांनी केली आहे.

''खरीप बागायती कापूस पिकाची वेचणी सुरू असल्याने कापसात गुलाबी बोंडअळी आढळून आली आहे. यंदा बोंडअळीचा व लाल्या रोगाचा प्रादुर्भाव लवकर झाल्याने कापसाच्या उत्पन्नात मोठी घट होणार आहे. पंतप्रधान पीकविमा योजनेचा लाभ केंद्र व राज्य सरकारने मिळून द्यावा.''- जितेंद्रसिंह गिरासे, शेतकरी, चिमठाणे (ता. शिंदखेडा)