Dhule Lok Sabha Election Vote Counting : लोकसभा सार्वत्रिक निवडणूक-२०२४ अंतर्गत धुळे लोकसभा मतदारसंघाची मतमोजणी मंगळवारी (ता. ४) सकाळी आठपासून शासकीय गुदाम (नगावबारी, देवपूर, धुळे) येथे होणार आहे. या मतमोजणीची तयारी अंतिम टप्प्यात असून, रविवारी (ता. २) मतमोजणी निरीक्षक एस. मालती यांनी मतमोजणी केंद्राची पाहणी करून तयारीचा आढावा घेतला. (Dhule Lok Sabha constituency election Inspection of counting center)

या वेळी जिल्हाधिकारी अभिनव गोयल, परिवीक्षाधीन जिल्हाधिकारी सर्वानंद डी, उपजिल्हा निवडणूक अधिकारी गंगाराम तळपाडे, कार्यकारी अभियंता (प्रधानमंत्री ग्रामसडक योजना) स्नेहल पवार यांच्यासह विविध विभागांचे अधिकारी उपस्थित होते.

श्रीमती एस. मालती यांनी धुळे लोकसभा मतदारसंघाच्या मतमोजणीसाठी धुळे ग्रामीण, धुळे शहर, शिंदखेडा, मालेगाव मध्य, मालेगाव बाह्य व बागलाण या विधानसभा मतदारसंघनिहाय मतमोजणी व्यवस्थेची पाहणी करून केलेल्या तयारीचा आढावा घेतला. (latest marathi news)

या वेळी जिल्हाधिकारी गोयल यांनी मतमोजणीच्या अनुषंगाने स्थापन करावयाचे विविध कक्ष, निवडणूक निरीक्षकांची बैठकव्यवस्था, विविध सोयी-सुविधांची उभारणी, उमेदवार व उमेदवारांचे प्रतिनिधींसाठी व्यवस्था, मतमोजणी पथके, माध्यम प्रतिनिधींसाठी माध्यम कक्ष, मतमोजणीसाठी नियुक्त अधिकारी-कर्मचारी, पोलिसांना पुरवावयाच्या सुविधा, पोलिस सुरक्षा, वाहनतळ जागानिश्चिती, वाहतूक वळविणे, कायदा व व्यवस्थेबाबत माहिती दिली. एस. मालती यांनी जिल्हा प्रशासनाने निवडणूक आयोगाच्या निर्देशानुसार मतमोजणीसाठी केलेली तयारी व या ठिकाणी उपलब्ध करून देण्यात आलेल्या सुविधांबाबत समाधान व्यक्त केले.