कापडणे : जिल्ह्यातील पंधरा गावांमध्ये दोन दोन शाळा एकाच आवारात भरतात. या शाळांचे एकाच शाळेत रूपांतर करण्याच्या ठरावास मार्चमध्ये मंजुरी मिळाली. त्यानंतर केवळ आठच गावांतील शाळांच्या एकत्रीकरणाचा फतवा निघाला आहे. त्यातही केवळ तीनच गावांतील शाळा एकत्रीकरण झाल्या आहेत. (Dhule Merge schools in one premises of ZP)

या पंधरा गावांतील शाळा एकत्रित

जिल्ह्यातील अवधान, मोघण, शिरूड, मोहाडी, सोनगीर, बोरीस, नेर, कापडणे, शिंदखेडा, मालपूर, चिमठाणे, रुदावली, वर्षी, वारूड व नरडाणा या पंधरा गावांतील जिल्हा परिषदेच्या एकाच आवारात भरणाऱ्या दोन शाळांचे रूपांतर एकाच शाळेत एकत्रीकरणाचा ठराव मार्च २०२४ मध्ये झालेला आहे.

आठ गावांतील शाळा एकत्रीकरणाचा फतवा

१ मे २०२४ ला अवधान, मोघण, नेर, शिरूड, मोहाडी प्र. डांगरी, कापडणे, सोनगीर व बोरीस या आठ गावांतीलच शाळा एकत्रीकरणाचा फतवा निघाला आहे.

प्रत्यक्षात तीनच शाळा एकत्रीकरण

मेमध्ये शिक्षणाधिकाऱ्यांनी पंधरा गावांऐवजी आठ गावांतील शाळा एकत्रीकरणाचे लेखी आदेश काढलेले आहेत. यात अवधान येथील शाळा क्रमांक एक व दोन, मोघण येथील शाळा क्रमांक एक व दोन, मोहाडी येथील शाळा क्रमांक एक व दोन, नेर येथील शाळा क्रमांक एक व चार, शिरूड येथील मुले व कन्या शाळा, मोहाडी व बोरीस येथील शाळा क्रमांक एक व दोन, कापडणे येथील शाळा क्रमांक एक व दोन आणि सोनगीर येथील शाळा क्रमांक एक व तीन या शाळांचा समावेश आहे. (latest marathi news)

प्रत्यक्षात तीन गावांतील शाळांना तोंडी आदेश

जिल्ह्यातील तीस शाळांचे जुन्या शाळेत एकत्रीकरणाचा जिल्हा परिषदेत ठराव झाला. त्यानंतर आठ शाळांचे आदेश निघाले. आता शिक्षण विस्ताराधिकाऱ्यांच्या माध्यमातून केवळ तीनच गावांतील शाळा एकत्रीकरणाच्या हालचाली तीव्र झाल्या आहेत. यात कापडणे, सोनगीर व नेर येथील शाळांचा समावेश आहे.

रेकॉर्ड एकत्रीकरण

शाळा एकत्रीकरण करून २०२४-२५ या शैक्षणिक वर्षात विलीनीकरण शाळेतील सर्व अभिलेखे, रेकॉर्ड, शाळेतील सर्व स्टॉक, साहित्य, रजिस्टर, इमारत आदी शाळा क्रमांक एकच्या मुख्याध्यापकांकडे हस्तांतर करण्यात येणार आहे.