धुळे : राष्ट्रीय पल्स पोलिओ लसीकरण मोहिमेंतर्गत ३ मार्चला धुळे शहरातील ५८ हजारांवर लाभार्थी बालकांना पोलिओ डोस देण्यात येणार आहे. धुळे शहरात यासाठी १८६ पोलिओ बूथची व्यवस्था करण्यात आली आहे. या मोहिमेंतर्गत लाभार्थी बालकांना पोलिस डोस घ्यावा, असे आवाहन महापालिकेतर्फे करण्यात आले आहे. (Dhule Polio dose Vaccination campaign marathi news)

जागतिक आरोग्य संघटनेने १९८८ मध्ये पोलिओ निर्मूलनाचे ध्येय निश्चित केले. त्यानुसार महाराष्ट्रात १९९५ पासून राष्ट्रीय पल्स पोलिओ लसीकरण मोहीम दर वर्षी राबविण्यात येत आहे. यामध्ये पाच वर्षांखालील सर्व बालकांना पोलिओची लस देण्याचे उद्दिष्ट निश्चित करण्यात येते.

गेली २५ वर्षे सातत्याने पोलिओ निर्मूलनाकरिता सर्व जण योगदान देत आहात. भारतात १३ जानेवारी २०११ नंतर आजतागायत एकही पोलिओ रुग्ण आढळून आलेला नाही. त्यामुळे भारताला पोलिओ निर्मूलनाचे प्रमाणपत्र मार्च-२०१४ मध्ये मिळाले आहे.

दरम्यान, पोलिओच्या समूळ उच्चाटनाच्या अनुषंगाने नेहमीप्रमाणे विशेष पल्स पोलिओ मोहीम लसीकरणाचे नियोजन करण्यात आले आहे. ३ मार्चला सकाळी आठ ते सायंकाळी पाचदरम्यान ही लसीकरण मोहीम राबविली जाईल. ज्या मुलांचे पोलिओ डोस काही कारणास्तव राहून जातील त्यांना ५ ते ९ मार्चदरम्यान आयपीपीआयअंतर्गत घरभेटी, मोबाईल टीम, ट्रान्झिट टीम, नाइट टीमद्वारे पोलिओ डोस दिला जाईल. (Latest Marathi News)

या विशेष पोलिओ लसीकरण मोहिमेचा सर्व लाभार्थ्यांनी लाभ घ्यावा व मोहीम १०० टक्के यशस्वी करण्यासाठी आरोग्य विभागास सहकार्य करावे, असे आवाहन धुळे महापालिकेच्या आयुक्त तथा प्रशासक अमिता दगडे-पाटील, अतिरिक्त आयुक्त करुणा डहाळे, वैद्यकीय आरोग्य अधिकारी डॉ. एम. आर. शेख, माता बालसंगोपन अधिकारी डॉ. संपदा कुलकर्णी यांनी केले आहे.

येथे मिळणार पोलिओ डोस

धुळे शहरातील महापालिकेच्या सर्व दवाखान्यांमध्ये, आपल्या घराजवळील पोलिओ बूथवर, बसस्थानक, रेल्वेस्थानक, टोलनाका, वीटभट्टी परिसर, नाइट टीममार्फत शहरातील सर्वच भागांत एकूण १८६ पोलिओ लसीकरण बूथचे नियोजन करण्यात आले आहे.