Dhule News : मालमत्ता कर, पाणीपट्टी, व्यापारी गाळे, ओटे, विकास शुल्क हे उत्पन्नाचे मुख्य स्रोत आहेत. त्या पार्श्वभूमीवर मालमत्ता करवसुलीचे निर्धारित उद्दिष्ट साधण्यासाठी महापालिका प्रयत्नशील आहे. २०२३-२४ या आर्थिक वर्षात चालू मागणी व थकबाकी मिळून एकूण ६० कोटी ७९ लाखांची मागणी आहे. यामध्ये शास्तीची रक्कम २० कोटींपर्यंत आहे. १ एप्रिलपासून आतापर्यंत १८ कोटी ९२ लाखांची रुपयांची वसुली झाली आहे. (Dhule Property tax recovered of Rs 18 crore)

मालमत्ता करासोबत विशेष पाणीपट्टी कर, विशेष स्वच्छता कर, विशेष शिक्षण कर, वृक्षसंवर्धन कर, अग्निशमन कर, जललाभ कर, दिवाबत्ती कर, मलनिस्सारण कर, पथकर, मलप्रवाह सुविधा कर, महाराष्ट्र शासन शिक्षण कर, रोजगार हमी कर, मोठ्या निवासी जागा कर आदी करांची वसुली होते.

शहरातील मोठ्या थकबाकी धारकांविरोधात कारवाईचा बडगा उगारल्यानंतर आता पाणीपट्टी व मालमत्ता कराच्या थकबाकीची प्रकरणे २८ सप्टेंबरला होणाऱ्या महालोक अदालतीत ठेवली आहेत. त्याअनुषंगाने २८ सप्टेंबरपर्यंत थकीत करावर शंभर टक्के शास्ती माफी दिली आहे. कर भरण्याकामी सहा हजार थकबाकीधारकांना नोटिसा बजवात असल्याची माहिती सूत्रांनी दिली.

मालमत्तांची भर

शहरातील ७० हजारांवर मालमत्तांची नोंद मनपात आहे. तसेच नूतन सर्वेक्षणात हद्दवाढ भागातील ३७ हजार व देवपूर भागातील १३ हजार ५३६, साक्री रोड भागातून २३ हजारांवर मालमत्तांची भर पडली आहे. मात्र, सुधारित कर आकारणीमुळे मालमत्ताधारकांना अवाजवी बिले गेली आहेत. (latest marathi news)

त्यास हरकतीच्या माध्यमातून नागरिकांनी विरोध केला आहे. नगरविकास विभागाच्या आदेशानुसार महापालिकेने जुन्या मालमत्तांना पूर्वीच्या दराने करआकारणी सुरू ठेवली आहे. पण, यासंदर्भातसुद्धा नागरिकांमध्ये संभ्रम आहे. त्यामुळे ऑगस्टमध्ये करवसुली ठप्प झाली होती. थकबाकीची प्रकरणे २८ सप्टेंबरला जिल्हा न्यायालयात होणाऱ्या महालोक अदालतीत ठेवण्यात येतील.

३२४ जणांची उपस्थिती

महापालिकेतर्फे सुधारित कर आकारणीच्या दृष्टीने कारवाई सुरू केली आहे. त्यात यापूर्वी प्राप्त हरकतींवर सुनावणी झाली. तर दिलेल्या तारखेला हजर न राहिलेल्या मालमत्ताधारकांना सुनावणीसाठी पुन्हा संधी देण्यात आली. सुनावणीचे कामकाज बुधवारी (ता. २५) मनपा सभागृहात झाले. त्यात ४०० मालमत्ताधारकांना बोलविण्यात आले होते. त्यापैकी ३२४ जणांनी सुनावणीला हजेरी लावली, तर ७६ जण गैरहजर होते.