Dhule News : शहराला पाणीपुरवठा करणाऱ्या तापी योजनेच्या मुख्य जलवाहिनीला १७ ठिकाणी गळत्या असल्याचे निदर्शनास आले आहे. या गळत्या रोखण्यासाठी धुळे महापालिकेतर्फे दुरुस्तीचे काम हाती घेण्यात येत आहे. त्यामुळे गुरुवारी (ता. ८) या योजनेवरील पाणीपुरवठा बंद करण्यात येणार आहे. २४ तासांसाठी पाणीपुरवठा बंद राहील. (Tapi water channel leaking in 17 places)

धुळे शहराला पाणीपुरवठा करणाऱ्या तापी पाणीपुरवठा योजनेवरील मुख्य जलवाहिनीवर नगावबारी एमबीआर ते सुकवद पंपिंग स्टेशनदरम्यान १७ ठिकाणी गळत्या लागल्याचे आढळून आले आहे. त्यामुळे या गळत्या दुरुस्तीचे काम महापालिकेतर्फे करण्यात येणार आहे.

या कामासाठी गुरुवारी पाणीपुरवठा बंद राहील. २४ तासांसाठी पाणीपुरवठा बंद ठेवण्यात येणार आहे. त्यामुळे धुळे शहरातील देवपूरचा काही भाग, मायक्रो टॉवर जलकुंभ, ऑक्सिडेशन जलकुंभ, मालेगाव रोड जलकुंभ, नाटेश्‍वर जलकुंभ, जामचा मळा जलकुंभ येथून नियोजनापेक्षा एक दिवस उशिरा पाणीपुरवठा होईल. नागरिकांनी याची नोंद घ्यावी, महापालिकेला सहकार्य करावे, असे आवाहन धुळे महापालिकेतर्फे करण्यात आले आहे.