Dhule Traffic Rule : शहरातील वाहतूक सुरळीत व्हावी, वाहतूक कोंडी व अपघात टळावेत यासाठी धुळे शहरात येणाऱ्या सर्व प्रकारच्या अवजड वाहनांना सकाळी सहा ते रात्री नऊपर्यंत प्रवेशबंदी करण्यात आली आहे. या आदेशाची अंमलबजावणी सुरू झाली. बुधवारी (ता. २९) सकाळी आठ ते दुपारी दोनदरम्यान शहरात प्रवेशित एकूण २८ अवजड वाहनांवर कारवाई करण्यात आली. संबंधित वाहनचालकांकडून प्रत्येकी पाचशे रुपये दंड वसूल करून त्यांची वाहने पुन्हा शहराबाहेर पाठविण्यात आली. ( Action on 28 heavy vehicles entering city )

पोलिस अधीक्षक श्रीकांत धिवरे यांच्या आदेशाची अंमलबजावणी करताना शहर वाहतूक शाखेतील अधिकारी व अंमलदारांनी बुधवारी (ता. २९) सकाळी आठ ते दुपारी दोनदरम्यान धुळे शहरातील दत्त मंदिर चौक, कराची चौक, छत्रपती शिवाजी महाराज पुतळा, चाळीसगाव रोड यामार्गे शहरात प्रवेश केलेल्या एकूण २८ अवजड वाहनांवर मोटार वाहन कायद्यान्वये कारवाई केली. तसेच प्रत्येकी पाचशे रुपये दंड आकारून ही वाहने पुन्हा शहराबाहेर पाठविली. बंदीच्या काळात अवजड वाहनधारकांनी शहरात वाहने आणू नयेत, अशी सूचना श्री. धिवरे यांनी केली. (latest marathi news)

अपघातानंतर रेटा

शहराच्या देवपूर भागात एल. एम. सरदार हायस्कूलसमोर २६ मेस रोहित सूर्यवंशी या १८ वर्षीय तरुणाचा ट्रक अपघातात मृत्यू झाला. त्यानंतर शहरात अवजड वाहनांच्या प्रवेशावर सामान्य नागरिकांसह विविध पक्ष-संघटनांकडून आवाज उठविण्यात आला. अवजड वाहनांमुळे शहरात अनेक अपघात होऊन नागरिकांना जीव गमवावा लागला आहे.

त्यामुळे अवजड वाहनांना निर्धारित वेळेत शहरात प्रवेशबंदीची मागणी झाली. या पार्श्वभूमीवर पोलिस अधीक्षक धिवरे यांनी अवजड वाहनांना प्रवेशबंदीचा आदेश काढून त्याची अंमलबजावणीही सुरू केली आहे. या आदेशाची काटेकोर अंमलबजावणी व्हावी, अशी अपेक्षा आहे.