कापडणे : विवाह म्हटला म्हणजे रुसवेफुगवे आलेच. मानपानाशिवाय विवाहच पूर्ण होऊ शकत नाही. वरातीसाठी घोडा नसेल तर आकांडतांडव करणाऱ्या वराची व वऱ्हाडींची कमी नाही. पण एका नवरदेवाने बैलगाडीवरूनच वराती काढली. त्याच्या नववधूनेही त्याच्यासोबत सहभागी होत शोभा वाढविली. या वरातीत सहभागी युवकांनी मोठा जल्लोष केला. या वरातीची जिल्हाभरात चर्चा सुरू आहे. नवरदेवाचे नाव मोठ्या आदराने घेतले जात आहे. (Dhule Wedding Ceremony news)

हातनूर (ता. धुळे) येथील वैभव जगताप व तळेगाव येथील हेतल जाधव यांचा विवाह मोठ्या थाटामाटात झाला. दोन्ही शेतकऱ्याची लेकरे आहेत. वैभव हा युवा शेतकरी आहे. आई-वडीलही शेतकरी आहेत. त्यांच्या पावलांवर पाऊल ठेवत उत्कृष्ट शेती सांभाळत आहेत. नोकरीच्या मागे न धावता शेतीसह गायी-म्हशी सांभाळून उत्कृष्ट शेती व्यवसायात रुजला आहे.

चांगली कमाईही काढीत आहे. वैभव हातनूर येथील प्रगतशील शेतकरी व वारकरी संप्रदायातील देवीदास जगताप यांचा मुलगा आहे, तर हेतल तळेगाव येथील राजेंद्र जाधव यांची कन्या आहे. दरम्यान, वैभवच्या या अभिनव वरातीचे पोलिसपाटील युवराज माळी, पिंटू पाटील आदींनी पुष्पगुच्छ भेट देऊन कौतुक केले. (Latest Marathi News)

"मला शेतकरीपुत्र असल्याचा अभिमान आहे. शेतीवर आई-वडिलांनी उत्पन्न काढून संसाराचा गाडा सांभाळलाय. मी त्याच शेतीतून चांगले उत्पन्न घेऊन समाधानी आहे. शेतीत राबराब राबून मला मोलाची साथ देत आहेत त्या सर्जाराजाच्या बैलगाडीवरून वरात काढण्याची इच्छा पूर्ण केली."- वैभव जगताप, नवरदेव, हातनूर