धुळे : शहरापासून दक्षिणेला आठ किलो मीटरवर असलेल्या शासकीय अनुदानातील एका गोदामाला आज मंगळवारी (ता. २१) सकाळी अकरा वाजता भीषण आग लागली. या आगीत फटाके, हल्दीरामची उत्पादने (Haldiram Products) जळून खाक झाली आहेत. घटनेत सुमारे दहा लाखांचं नुकसान झाल्याचा प्राथमिक अंदाज आहे.

मालेगाव रोडवर एमआयडीसी आहे. (Malegaon MIDC) तिच्या विरूध्द दिशेला समोर शासकीय अनुदानाचा लाभ घेत काही व्यावसायिकांनी गोदाम उभारले आहे. त्यातील एका गोदामाचे दोन भाग करत योगेश ब्राह्मणकर यांनी अर्ध्या भागात फटाके, तर उर्वरित भागात नंदुरबारस्थित सचिन शर्मा यांनी शाम पुष्प एजन्सीच्या माध्यमातून हल्दीराम कंपनीची निरनिराळी उत्पादने ठेवली होती.

शहरात मंगळवारी ४४.५ अंशावर गेलेले तापमान आणि त्यात शॉर्ट सर्किटमुळे गोदामात फटाके असलेल्या भागाला आग लागली. ती पसरत हल्दीरामची उत्पादने असलेल्या भागाकडे गेली. त्यात दोन्ही गोदामातील सुमारे दहा लाख किमतीचा माल खाक झाल्याचा प्राथमिक अंदाज आहे. घटनेजवळील लळिंग टोल नाक्याकडील अग्निशमनचे चार बंब, तर महापालिकेच्या तीन बंबांनी आग विझविण्यासाठी शर्थीचे प्रयत्न केले. मोहाडी पोलिस ठाण्याचे (Mohadi Police Station) पथक स्थितीवर नियंत्रण ठेऊन होते.