शिरपूर (जि. धुळे) : शिंदेसाहेब, आपल्याला शिवसेनेचा (Shiv sena) वेगळा गट स्थापन करता येणार नाही असे कळते. म्हणून कोणताही संकोच न बाळगता आमच्या पक्षात सामील व्हा असा प्रस्ताव येथील मानव एकता पक्षाने शिवसेनेचे बंडखोर नेते तथा मंत्री एकनाथ शिंदे (Eknath Shinde) यांना दिला आहे. (Manav Ekta paksha open offer to eknath shinde dhule news)

पक्षाचे संस्थापक अध्यक्ष सुभाषसिंह जमादार यांनी रविवारी (ता.26) प्रस्तावाचे पत्र शिंदे यांच्याकडे रवाना केले. जमादार यांनी सांगितल्यानुसार, मानव एकता पक्षाच्या राष्ट्रीय कार्यकारिणीची बैठक दिल्ली येथे झाली. महाराष्ट्रातील सध्याच्या राजकीय घडामोडींवर चर्चा होऊन एकनाथ शिंदे यांना पाठिंबा जाहीर करण्यात आला. त्यानंतर शिंदे यांना प्रस्तावाचे पत्र रवाना करण्यात आले.

‘आपल्या बंडामागील भूमिका मान्य आहे. आपण सरकार कोसळवण्याइतपत सक्षम आहात. मात्र सद्यस्थितीत आपल्याला शिवसेनेचा वेगळा गट स्थापन करता येणार नाही. मानव एकता पक्ष आपला समविचारी असून आपल्या समर्थक आमदारांसह त्यात प्रवेश करावा असे पक्षाध्यक्ष जमादार यांनी म्हटले आहे.

"२०११ पासून आमच्या पक्षाची मान्यता आहे. जनतेच्या विकासासाठी आम्ही संघर्ष करीत आहोत. एकनाथ शिंदे यांची तांत्रिक अडचण लक्षात घेऊन त्यांना प्रस्ताव दिला आहे."

- सुभाषसिंह जमादार, संस्थापक अध्यक्ष, मानव एकता पक्ष.