कुसुंबा (धुळे) : ग्रामपंचायतींनी वीजबिल न भरल्याने महावितरणच्या नऊ विभागांतील ७२ ग्रामपंचायतींतर्गत येणाऱ्या १५३ गावांच्या पथदिव्यांचा वीजपुरवठा खंडित केला आहे. 
कृषिपंपासह घरगुती वीजपुरवठा खंडित करत असताना आता महावितरणने गावातील पथदिव्यांचा व गावाला पाणीपुरवठा करणाऱ्या वीजपंपांचा पुरवठा खंडित करण्याचा सपाटा लावला आहे. धुळे ग्रामीण उपविभागांतर्गत आर्वी, नेर, नेर (ग्रामीण), बोरवीर, शिरूड, कुसुंबा, देऊर, खेडा, मुकटी आदी नऊ विभागांत ७२ ग्रामपंचायती असून, १५३ गावांचा समावेश आहे. आधीच कोरोना काळ सुरू असून, त्यात पथदिवे बंदची भर पडली आहे. ग्रामीण भागातील नागरिक चिंतेत आहेत. संबंधितांनी लवकर वीजबिल भरण्यासंदर्भात महावितरणकडून नोटिसाही बजावल्या आहेत. 

गावांची थकबाकी २६ कोटी
धुळे ग्रामीण उपविभागांतर्गत नऊ विभाग आहेत. त्यात ७२ ग्रामपंचायतींचा समावेश असून, १५३ गावे आहेत या गावांची एकूण थकबाकी २६ कोटी १३ लाख रुपये आहे, तर वॉटर सप्लाय (गावाला पाणीपुरवठा करणारे पंप) एकूण ११४ ग्राहक असून, ४६ ग्राहकांचे वॉटर सप्लाय पंपचे कनेक्शन खंडित केले आहे. त्यांची थकबाकी तीन कोटी ६३ लाख रुपये आहे. एकूण ग्राहक ११४ ची वॉटर सप्लाय एकूण दहा कोटी २० लाख रुपये थकबाकी आहे. 
 
संबंधितांनी वीजबिल वेळेत भरून महावितरणसह शासनाला सहकार्य करावे, महावितरण आपल्यासाठीच आहे. उपविभागात कोट्यवधींची थकबाकी वीज ग्राहकांकडे आहे. अधिकाऱ्यांना वीजबिल भरण्याची अपेक्षा असते, काही ठिकाणी अधिकाऱ्यांना खुर्चीला बांधून ठेवले व चपलांचा हार घातला हे निषेधार्ह आहे. याचा महाराष्ट्र राज्य कनिष्ठ अभियंता संघटनेकडून निषेध आहे. अशा घटना पुन्हा घडू नयेत व अधिकाऱ्यांना वेठीस धरू नये, महावितरणला सहकार्य करावे. 
- शशिकांत गांगुर्डे, शाखा अभियंता, कुसुंबा 
 
संपादन – राजेश सोनवणे