कापडणे : धुळे जिल्ह्यात महिनाभरापासून पाऊस सुरू आहे. उशिराचा पाऊस (Rain)आणि दुबार पेरणी (Showing) करून तग धरून तरारलेल्या व काढणीस आलेल्या पिकांचे (Crop Damage) यामुळे मोठे नुकसान होत आहे. चालू खरीप हंगामाचा काढणीचा खर्चही निघणे कठीण झाले आहे. अशा स्थितीत संततधारेने शेतकऱ्यांचे नुकसान केले आहे. बागायती कापसासह कोरडवाहू कापसाचे (Cotton) नुकसान होत आहे. पांढरे सोने काळे पडू लागले आहे. बुडालेला हंगाम आवरण्यासाठी शेतकऱ्यांची (Farmers) दमछाक होत आहे.

पाच आठवड्यांपासून संततधार सुरू आहे. बाजरी, मका, ज्वारी, सोयाबीन, कापूस आदी पिकांचे नुकसान होत आहे. उशिराच्या पेरण्या त्यानंतरही दुबार पेरण्या झाल्या. त्यातच पावसाने दडी मारली होती. यामुळे पिकांचे मोठे नुकसान झाले. थोडाफार हंगाम हाती लागेल, अशी शेतकऱ्यांना शाश्वती होती.

मात्र संततधारेमुळे मोठे नुकसान झाले. धुळे जिल्ह्यात कापूस या नगदी पिकामुळे शेतकऱ्यांच्या हाती थोडाफार पैसा खेळता राहतो. या वर्षी कापसावर लाल्याचा प्रादुर्भाव वाढत चालला आहे. अतिवृष्टीने बोंडे काळवंडली आहेत. ओला कापूस काढणीचा खर्च वाढला आहे. शेतकरी अधिक भाव मिळेल, या आशेने कापूस वाळवत आहेत. काढणी व वाळवणे आदींमुळे शेतकऱ्यांची दमछाक होत आहे.