निजामपूर : कोरोना विषाणू संसर्गाच्या पार्श्‍वभूमीवर जैताणे (ता. साक्री) येथे आज मोजक्‍या नातेवाईकांच्या उपस्थितीत व "फिजिकल डिस्टन्स' राखत एक विवाह सोहळा झाला. या विवाहाचे वैशिष्ट म्हणजे वधू-वराच्या परिवाराने कोरोनाविरुद्धच्या लढाईत मदतीसाठी मुख्यमंत्री सहाय्यता निधीत अकरा हजार रुपये दिले. नवदाम्पत्याच्याहस्ते मदतीचा धनादेश मंडळाधिकाऱ्याकडे सुपूर्द करण्यात आला.

जैताणे येथील ग्रामपंचायतीचे वरिष्ठ लिपिक तथा सामाजिक कार्यकर्ते यादव तुळशीराम भदाणे यांचा एकुलता मुलगा भूषण व येथीलच राजू टेलर उर्फ राजेंद्र रामभाऊ सूर्यवंशी यांची मुलगी किर्तना यांचा आज दुपारी घरीच विवाह झाला. वधूवरांनी मास्क, हातमोजे परिधान केले होते. तर उपस्थितांना सॅनिटायझरने हात स्वच्छ करण्याच्या सूचना देण्यात आल्या. निजामपूरचे मंडळाधिकारी विजय बावा यांच्यासह साक्रीचे मंडळाधिकारी अनिल बाविस्कर, तलाठी भूषण रोजेकर, सरपंच ईश्वर न्याहळदे, माजी सरपंच तथा गटनेते संजय खैरनार, ग्रामविकास अधिकारी अनिल राठोड, लिपिक यादव भदाणे, माजी उपसरपंच नवल खैरनार, समता परिषदेचे जिल्हाध्यक्ष राजेश बागुल, उपाध्यक्ष गोकुळ पाटील, तालुकाध्यक्ष सतीश बाविस्कर, एकनाथ सोनवणे, शांतीलाल भदाणे, भिका न्याहळदे, राजू सूर्यवंशी, छोटू भदाणे, मंगलबाई भदाणे, मिनाबाई सूर्यवंशी, गणेश अहिरे, भगवान रोकडे, पुरोहित अरुण धारणे आदींसह भदाणे व सूर्यवंशी कुटुंबीय उपस्थित होते. कोरोनाच्या पार्श्वभूमीवर झालेल्या या विवाह सोहळ्यात फिजिकल डिस्टन्स राखण्याची खास खबरदारी घेतली गेली. भदाणे व सूर्यवंशी परिवाराने सामाजिक बांधिलकी दाखवत कोरोनाविरुद्धच्या लढाईत मदतीसाठी शासनाला अकरा हजार रुपयेही देऊ केले. हा मदतीचा धनादेश मंडळाधिकारी विजय बावा यांच्याकडे सुपूर्द करण्यात आला.