Dhule News : अनेक पटीने वाढ केलेली घरपट्टी रद्द करण्यात यावी, धुळे शहरातील मालमत्तांसाठी कराची आकारणी दुपटीपेक्षा जास्त करू नये, असे स्पष्ट निर्देश नगरविकास विभागाचे प्रधान सचिव गोविंदराज यांनी दिले आहेत.

अशी माहिती आमदार फारूक शाह यांनी प्रसिद्धीपत्रकाद्वारे दिली. (MLA Farooq Shah statement of dhule citizen Relief for property tax issues news)

शासनदरबारी सातत्याने धुळेकरांची व्यथा मांडल्यामुळे शासनाने सकारात्मक निर्णय घेऊन धुळेकरांना दिलासा दिल्याचा दावाही आमदार शाह यांनी केला आहे.

धुळे शहारातील मालमत्ता करवाढप्रश्‍नी नागरिकांमध्ये असंतोष असल्याच्या पार्श्वभूमीवर विधिमंडळाच्या हिवाळी अधिवेशन काळात नगरविकास विभागाचे प्रधान सचिव गोविंदराज यांची भेट घेऊन त्यांच्याकडे धुळेकरांची कैफियत मांडली.

त्यानंतर प्रधान सचिवांनी या विषयावर २ जानेवारीला बैठक घेतली. धुळे शहर हे आर्थिकदृट्या अतिमागास शहर असून, शहरात मोठे उद्योगधंदे नसल्याने मोठ्या प्रमाणात बेरोजगारी आहे.

त्यामुळे शहरातील नागरिकांना वाढीव घरपट्टी भरणे जिकिरीचे होत आहे. हद्दवाढ झाल्यामुळे शहर विकासकामाचा मोठा बोजा आहे.

शहरात यापूर्वीसुद्धा घरपट्टीवाढ करण्यात आले होती व आजसुद्धा मोठ्या प्रमाणात नागरिकांकडून घरपट्टी वसूल केली जात आहे; परंतु ही घरपट्टी गरीब नागरिकांना भरणे अशक्य होत आहे.

या पार्श्वभूमीवर ज्याप्रमाणे महापालिकेने ठराव करून घरपट्टीवाढ केले आहे ती वाढ आपल्या स्तरावरून रद्द करावी, वाजवी घरपट्टी लावण्यात यावी, अशी मागणी आपण प्रधान सचिवांकडे केल्याचे आमदार शाह यांनी म्हटले आहे.

बैठकीत अनेक पटीने वाढ केलेली घरपट्टी रद्द करण्यात यावी व धुळे शहरातील मालमत्तांसाठी कराची आकारणी दुपटीपेक्षा जास्त करू नये, असे स्पष्ट निर्देश प्रधान सचिव गोविंदराज यांनी दिल्याचा दावा आमदार शाह यांनी केला आहे.

शासनदरबारी सातत्याने धुळेकरांची व्यथा मांडल्यामुळे शासनाने सकारात्मक निर्णय घेऊन धुळेकरांना दिलासा दिल्याचेही आमदार शाह यांनी प्रसिद्धीपत्रकात म्हटले आहे.