Nandurbar Crime: शहरातील अमृत चौक परिसरात रात्रीच्या सुमारास योगेश चौधरी यांच्यावर धारदार शस्त्राने वार करून खून करण्यात आला. या घटनेने नंदुरबार शहर हादरले आहे. घटनास्थळ परिसरात पोलिस बंदोबस्त तैनात करण्यात आला आहे. '

(Murder of young man in main chowk nandurbar crime news)

दरम्यान, पोलिसांकडून घटनास्थळ परिसरातील सीसीटीव्ही फुटेज तपासून काही संशयितांना चौकशीसाठी ताब्यात घेण्यात आले आहे. खुनाचे कारण मात्र समजू शकलेले नाही. ऐन दिवाळीत झालेली ही घटना नंदुरबारकरांच्या अंगावर शहारा आणणारी आहे.

नंदुरबार शहरातील मध्यवर्ती भागात अमृत सिनेमा चौकात रविवारी मध्यरात्री एक ते पहाटे अडीचदरम्यान तरुणाचा खून झाला. योगेश चौधरी (रा. भाट गल्ली, नंदुरबार) असे मृत तरुणाचे नाव आहे. खुनाचे कारण अद्याप समजू शकले नाही. पहाटेच्या सुमारास रक्ताच्या थारोळ्यात पडलेल्या तरुणाला उपचारासाठी काही जणांनी रुग्णालयात दाखल केले असता डॉक्टरांनी त्यास मृत घोषित केले.

शहरात खून झाल्याचे वृत्त पसरल्याने अमृत चौकात नागरिकांनी एकच गर्दी केली. घटनास्थळी पोलिस पथक तत्काळ दाखल झाले. कडक बंदोबस्त तैनात करण्यात आला. दिवसभर खुनाचे कारण शोधण्यासाठी तपास यंत्रणा कामाला लागली आहे. त्या परिसरातील सीसीटीव्ही फुटेज तपासणीसह काही माग सापडतो का याबाबत पोलिस यंत्रणा तापसणी करीत आहे.

त्यावरून काही संशयितांना चौकशीसाठी पोलिसांनी ताब्यात घेतले असल्याचे वृत्त आहे. मात्र खुनाचे कारण अद्याप कळू शकलेले नाही. मात्र धारदार शस्त्राने मारल्याने मृत्यू झाल्याची चर्चा दिवसभर होती. रात्री उशिरापर्यंत नंदुरबार शहर पोलिस ठाण्यात घटनेच्या नोंदीचे काम सुरू होते. घटनास्थळी अपर पोलिस अधीक्षक नीलेश तांबे, उपविभागीय पोलिस अधिकारी संजय महाजन, स्थानिक गुन्हे अन्वेषण शाखेचे पोलिस निरीक्षक किरणकुमार खेडकर आणि पथकाने भेट दिली.