नंदुरबार लोकसभा मतदारसंघाच्या निवडणुकीत विजयी उमेदवार काँग्रेसचे ॲड. गोवाल पाडवी यांच्या यशात तळोदा तालुक्याच्या मोठा वाटा राहिला. तालुक्यातून तब्बल २१ हजारांहून अधिक मताधिक्य ॲड. पाडवी यांना मिळाले. यातही ग्रामीण भागातील मतदारांनी पाडवींना मताधिक्य दिले, तर शहरी भागात डॉ. हीना गावित यांना मताधिक्य मिळाले. तळोदा तालुक्याचा हाच मूड भविष्यात विधानसभेलादेखील राहिल्यास काँग्रेसच्या आशा वाढणार आहेत. भाजपला यातून बोध घ्यावा लागणार आहे. (Nandurbar Lok Sabha Election 2024 Result success of Adv goval Padavi)

शहादा तळोदा विधानसभा मतदारसंघात संपूर्ण तळोदा तालुक्याच्या समावेश होतो. यंदा लोकसभा निवडणुकीत तळोदा तालुक्यातील ९३ हजार २१० मतदारांनी मतदानाचा हक्क बजावला होता. यात तालुक्यात आरक्षण, संविधान बदल या मुद्द्यांची चर्चा होती, तर मणिपूर घटनेबाबत नाराजी होती.

भाजपने प्रचारात केलेल्या विकासकामांवर भर दिला होता, तर काँग्रेसने तालुक्यात ‘होम टू होम’ प्रचारावर भर दिला. त्यात भारतीय जनता पक्षाचे कार्यकर्ते होम टू होम भेटी देण्यात कमी पडल्याचे दिसून आले होते. तळोदा शहरात भाजपची प्रचारसभा मात्र झाली होती, तर काँग्रेसची शहरात एकही सभा झाली नाही.

दुसरीकडे तालुक्यात शिवसेना उद्धव ठाकरे गट, राष्ट्रवादी काँग्रेस पक्ष शरदचंद्र पवार गट व मार्क्सवादी कम्युनिस्ट पक्षाच्या कार्यकर्त्यांनीदेखील महत्त्वाची भूमिका बजावली. त्यातून काँग्रेसला मोठा फायदा झाला. म्हणजेच महाविकास आघाडी एकसंध होती, तर भारतीय जनता पक्षाच्या शहर व तालुक्यातील नेत्यांमध्ये तसेच कार्यकर्त्यांमध्येदेखील एकवाक्यता दिसून आली नाही. (latest marathi news)

काँग्रेसकडे कोणताही मोठा नेता नसताना तालुक्यातील सामान्य कार्यकर्त्यांनीदेखील आपले काम चोख बजावल्याचे यातून दिसून येते. त्यामुळे ग्रामीण भागातून ॲड. पाडवी यांना मताधिक्य मिळाले, तर शहरातून मात्र डॉ. गावित यांना जास्त मते मिळाली. --

ग्रामीण भागाची निर्णायक भूमिका

तळोदा शहरात डॉ. गावित यांना नऊ हजार १२८, तर ॲड. पाडवी यांना सहा हजार ५८३ मते मिळाली. याउलट ग्रामीण भागात ॲड. पाडवी यांना ४७ हजार २४२, तर डॉ. हीना गावित यांना २६ हजार २०५ मते मिळाली. त्यामुळे ग्रामीण भागाने खासदार निवडीत महत्त्वाची भूमिका बजावली.

त्यामुळे येणाऱ्या काळात भारतीय जनता पक्षाला तालुक्यात मोठी मेहनत करावी लागणार असल्याचे दिसून येत आहे, तर काँग्रेसच्या गोटात आनंदाचे वातावरण असून, कोणताही मोठा नेता तालुक्यात नसताना तालुक्याने मताधिक्य दिले असल्याने त्याबाबत एकच चर्चा होत आहे.