नंदुरबार : सातपुड्यातील दुर्गम भागात राहणाऱ्या दिव्या पावरा या आदिवासी तरुणीची राज्य महिला फुटबॉल संघात निवड झाली आहे. जयपूर येथे होणाऱ्या राष्ट्रीय फुटबॉल स्पर्धेसाठी ती रवाना झाली आहे. तिचे वडील रोजगार सेवक, तर आई स्वयंपाकी म्हणून आश्रमशाळेत काम करते. गरीब कुटुंबातील मुलीचे राज्य महिला फुटबॉल संघात निवड झाल्याने सर्वत्र अभिनंदन करण्यात येत आहे. (Success Story Divya Pawara selection in state women football team)

सातपुड्यातील दुर्गम भाग असलेल्या पाचव्या पुड्यात वसलेल्या धडगाव तालुक्यातील सोन खुर्द येथील दिव्या पावरा रहिवाशी आहे. तिचे वडील विजयसिंग आत्माराम पावरा हे ग्रामपंचायतीमध्ये रोजगार सेवक म्हणून काम करतात. तर आई कमल पावरा या स्वयंपाकी म्हणून आश्रमशाळेत काम करतात.

चौदाशे लोकसंख्या असलेल्या या सोन खुर्द गावात चौथीपर्यंत दिव्या पावराचे शिक्षण झाले. घरात पाच भावंडांमध्ये दिव्या सर्वात मोठी आहे. पुढील शिक्षणासाठी तिने छत्रपती संभाजी नगर येथील सैनिकी विद्यालयात प्रवेश घेतला. तेथे शिक्षण घेत असताना तिला फुटबॉलची आवड निर्माण झाली.

ती चांगले खेळत असल्याचे पाहून तिची निवड पुणे येथील क्रीडा प्रबोधिनीत झाली. सध्या ती बारावीचे शिक्षण तेथेच घेत आहे. जयपूर येथे १३ ते १७ ऑक्टोबरदरम्यान ऑल इंडिया फुटबॉल फेडरेशनच्या वतीने होणाऱ्या महिला राष्ट्रीय फुटबॉल स्पर्धेत तिची निवड झाली आहे. प्रशिक्षक म्हणून धीरज मिश्रा यांनी मार्गदर्शन केले. (latest marathi news)

घरची परिस्थिती बेताची

दिव्या पावरा ही आदिवासी तरुणी सातपुड्यातील दुर्गम भागातील छोट्या गावातील आदिवासी कुटुंबातील आहे. तिचे वडील ग्रामपंचायत रोजगार सेवक आहेत. आई आश्रमशाळेत रोजंदारीवर स्वयंपाकी म्हणून काम करीत होती. वर्षभरापूर्वीच तिची कायमस्वरूपी नियुक्ती झाली. घरची परिस्थिती बेताची होती. वडिलांचे फक्त स्वतःचे घर आहे.

जमिन नाही. मात्र, शिक्षणाचे महत्त्व त्यांना समजल्याने त्यांनी तिला पुढील शिक्षणासाठी छत्रपती संभाजीनगर येथे पाठवले. याआधीही दिव्याची सतरा वर्षाच्या आतील संघात निवड झाली होती. या ज्युनियर संघात ती खेळल्यानंतर आता सीनियर संघात तिची निवड झाली आहे. देशासाठी खेळण्याचे तिचे स्वप्न असून, भारतीय संघात स्थान मिळविण्यासाठी अथक प्रयत्न करणार असल्याचे दिव्याने सांगितले.