नामपूर : दारूच्या एका प्यालामुळे आजही अनेक तरुणांच्या आयुष्याची आणि पर्यायाने त्यांच्या संसाराची दुरवस्था होत आहे. असे असले तरी तळीरामांमुळे सरकारी तिजोरी मालामाल झाल्याचे राज्य उत्पादन शुल्काच्या आकडेवारीवरून दिसत आहे. यंदा नोव्हेंबरअखेर मद्यविक्रीच्या माध्यमातून सरकारला सुमारे १२ हजार ९५२ कोटी ८२ लाख रुपयांचा महसूल मिळाल्याने राज्याच्या अर्थव्यवस्थेला मोठा हातभार लागला आहे.

कोरोनाकाळात राज्य सरकारची अर्थव्यवस्था खिळखिळी झाली होती. उत्पन्नाअभावी अनेक विकासकामे रखडली. सरकारच्या विविध प्रकारच्या अनुदानात कपात करण्यात आली. अशा प्रतिकूल परिस्थितीत राज्य उत्पादन शुल्क विभागाने राज्याच्या अर्थव्यवस्थेला संजीवनी दिल्याची बाब अधोरेखित झाली आहे. राज्य उत्पादन शुल्क विभागाने २०२२- २३ या आर्थिक वर्षाची नोव्हेंबर अखेर आकडेवारी नुकतीच जाहीर केली असून, गेल्यावर्षीच्या तुलनेत यंदा महसुलीत तब्बल ३२.८६ टक्के वाढ झाली आहे. २०२१- २२ या आर्थिक वर्षात एप्रिल ते नोव्हेंबर अखेरपर्यंत ९७४८.९६ कोटी रुपयांचा महसूल जमा झाला होता. यंदा मद्य विक्रीचा आलेख उंचावल्याने सरकारच्या उत्पन्नात घसघशीत वाढ झाली आहे.