नाशिक : जिल्‍ह्यात उपचार घेणाऱ्या सक्रिय (ॲक्‍टिव्‍ह) रुग्‍णांची संख्या पुन्‍हा एकदा स्‍थिरावली आहे. मंगळवारी (ता. २९) जिल्‍ह्यात १३० रुग्‍णांचे अहवाल पॉझिटिव्‍ह आले, तर १७२ रुग्‍णांनी कोरोनावर यशस्‍वी मात केली. चार बाधितांचा उपचारादरम्‍यान मृत्‍यू झाला. सद्यःस्‍थितीत जिल्‍ह्यात दोन हजार ४६५ बाधितांवर उपचार सुरू आहेत. (130 new corona positive patients reported in nashik district)

मंगळवारी नाशिक ग्रामीण क्षेत्रात ८६, नाशिक महापालिका क्षेत्रात ३९, मालेगाव महापालिका क्षेत्रात चार, तर जिल्‍हाबाहेरील एका रुग्‍णाचा अहवाल पॉझिटिव्‍ह आला. जिल्‍ह्यात उपचारादरम्‍यान मृत्‍यू झालेल्‍या चार बाधितांपैकी प्रत्‍येकी दोन नाशिक महापालिका व नाशिक ग्रामीण क्षेत्रातील आहेत. चारही मृत ज्‍येष्ठ नागरिक आहेत. शहरातील सातपूर येथील ७० वर्षीय, तर टागोरनगरमधील ८० वर्षीय पुरुष बाधिताचा मृत्‍यू झाला. नाशिक ग्रामीणमध्ये भाऊसाहेबनगर येथील ७३ वर्षीय, ममदापूर (ता. येवला) येथील ६२ वर्षीय महिलेचा उपचारादरम्‍यान मृत्‍यू झाला.

सायंकाळी उशिरापर्यंत एक हजार १४० अहवाल प्रलंबित होते. यात नाशिक ग्रामीणमधील सर्वाधिक ५२९, मालेगाव क्षेत्रातील साडेतीनशे, नाशिक महापालिका क्षेत्रातील २६१ रुग्‍णांना अहवालाची प्रतीक्षा होती. जिल्‍हाभरातील रुग्‍णालये व गृहविलगीकरणात ५६८ रुग्‍ण दाखल झाले. यापैकी ५३७ रुग्ण नाशिक महापालिका क्षेत्रातील आहेत. जिल्‍हा रुग्णालयात एक रुग्‍ण दाखल झाला.