नाशिक : डिसेंबरच्या शेवटच्या दोन आठवड्यात डेंगीचे तब्बल दीडशे नवीन रुग्ण आढळून आल्याने मलेरिया विभागाने डेंगीचे उत्पत्ती स्थानी आढळणाऱ्या ठिकाणच्या व्यावसायिकांना नोटिसा बजावण्याच्या सूचना दिल्या आहेत. (150 dengue patients in the last 2 weeks of December Nashik Update)

ऑगस्ट महिन्यात डेंगी ४७ रुग्ण आढळून आले होते. त्यानंतर सप्टेंबर महिन्यात २६१, तर ऑक्टोबर महिन्यात १९३ रुग्ण आढळले. नोव्हेंबर महिन्याचा तब्बल २७५ जणांना डेंगी असल्याचे आढळून आले.

डिसेंबर महिन्यात २०६ नवीन डेंगी बाधित रुग्ण आढळून आले. यातील दीडशे रुग्ण डिसेंबरच्या अखेरच्या दोन आठवड्यात आढळून आले. त्यामुळे डेंगी बाधितांचा एकूण आकडा एक हजार १९१ च्या वर गेला आहे.

डेंगी डासांची उत्पत्ती स्थाने आढळल्या प्रकरणी बांधकाम व्यवसायिकांसह नागरिकांना नोटिसा बजावल्या जाणार आहे. नोव्हेंबर महिन्यात सिडकोतील डीजीपीनगर-कामटवाडे परिसरातील एका व्यक्तीचा डेंगीने मृत्यू झाला होता.

म्हसरुळ भागातील ६५ वर्षीय वृद्ध महिलेला डेंगीचे लागण होऊन बळी गेला होता. मागील वर्षात डेंगीचे दोन बळी गेले.