वणी (जि. नाशिक) : पिंगळवाडी, ता. दिंडोरी येथील शेतकऱ्याच्या गटारी अमावस्येच्या (ता. २८) दिवशी वीस बकऱ्यांची अज्ञात चोरट्याने चोरी करुन नेल्याची खळबळजनक घटना घडली असून याबाबत वणी पोलिसांत बकऱ्या चोरीची तक्रार दाखल करण्यात आली आहे. (Latest Marathi News)

पिंगळवाडी, ता. दिंडोरी येथील त्रंबक रेवजी भरसट यांचा शेती व्यवसायाला जोडधंदा म्हणून बकरी पालनाचा व्यवसाय आहे. त्यांची पिंगळवाडी शिवारातच शेतजमिन गट नं. ७ असून सदर क्षेत्रात त्यांचे घर व त्याला लागुन बकऱ्या पालनासाठी शेड बनवीला आहे. गुरुवार, ता. २८ रोजी मुलगा नामे घेवर त्रंबक भरसट हा नजीकच्या डोंगरावर नेहमी प्रमाणे आपल्याकडे असलेल्या सर्वच्या सर्व वीस बकऱ्या चारण्यासाठी घेऊन गेला होता. बकऱ्या चारुन झाल्यानंतर नित्य नियमाने डोंगरावरच बकऱ्यांना नेहमीच्या जागी बसवुन दुपारी जेवणासाठी १२ वाजेच्या दरम्यान डोंगर उतरुन खाली आला. व जेवण आटोपून तो पुन्हा दोन वाजेच्या दरम्यान परत डोंगरावर गेला असता त्यास संबधीत जागी बकऱ्या दिसुन आल्या नाही.

दरम्यान भरसट कुटुंबीयांनी संपूर्ण डोंगर परीसर, पिंगळवाडी शिवार, आसपासची गावे, बाजाराची ठिकाणे यांचा बकऱ्यांचा शोध घेतला असता मिळुन आल्या नाही. चोरी गेलेल्या कमध्ये काळ्या रंगाच्या ५ बकऱ्या, ताबंड्या ८, पांढऱ्या ५, काळी - पांढरी रंगाच्या ३ अशा वर्णनाच्या एकूण १ लाख किमंतीच्या २० बकऱ्यांचा समावेश आहे. पिंगळवाडी शिवारात अधून मधून बिबट्याचा वावर होत असला तरी एकाचवेळी वीस बकऱ्या पूर्णपणे गायब झाल्याने अज्ञाच चोरट्याने बकऱ्यांचा माघावर राहून बकऱ्या हुसकावून नेउन व वाहनात घालून चोरून नेल्या असल्याची शक्यता वर्तविण्यात आली आहे. याबाबत त्रंबक भरसट यांनी वणी पोलिसांत बकऱ्या चोरीची तक्रार दाखल केली आहे.