नाशिक : नव्‍याने आढळणाऱ्या कोरोना (Corona) बाधितांच्या संख्येत चढ-उतार सुरु आहे. बुधवारी (ता.६) जिल्‍ह्‍यात ९६ रुग्‍णांचे कोरोनाविषयक अहवाल पॉझिटिव्‍ह आले. तर ९२ रुग्‍णांनी कोरोनावर यशस्‍वीरीत्‍या मात केली आहे. एका बाधिताच्‍या मृत्‍यूची नोंद आहे. सद्यःस्‍थितीत जिल्‍ह्‍यात ९०४ बाधितांवर उपचार सुरु आहेत. दरम्‍यान आतापर्यंत जिल्ह्यात चार लाख ८ हजार ९५२ कोरोना बाधित आढळले असून, यापैकी तीन लाख ९९ हजार ४०६ रुग्‍णांनी कोरोनावर मात केली आहे. यातून कोरोनामुक्‍त रुग्‍णांची संख्या चार लाखांच्‍या घरात पोहचली आहे.

प्रलंबित अहवालांची संख्या वाढली

बुधवारी नाशिक ग्रामीण क्षेत्रात आढळलेल्‍या कोरोना बाधितांची संख्या साठ राहिली. नाशिक महापालिका क्षेत्रात ३५, तर जिल्ह्याबाहेरील एका बाधिताला कोरोनाची लागण झाल्‍याचे निदान झाले आहे. जिल्ह्यात एका बाधिताच्‍या मृत्‍यूची नोंद असून, मृत हा नाशिक महापालिका क्षेत्रातील आहे.
प्रलंबित अहवालांची संख्या वाढलेली असून, सायंकाळी उशिरापर्यंत दोन हजार ७०४ रुग्‍णांना अहवालाची प्रतीक्षा कायम होती. नाशिक ग्रामीण क्षेत्रातील दोन हजार ३२६ तर मालेगावच्‍या २०७, नाशिक शहरातील १७१ रुग्‍णांना अहवालाची प्रतीक्षा कायम होती. जिल्‍हाभरातील रुग्‍णालये व गृहविलगीकरणात ६५५ रुग्‍ण दाखल झाले. यापैकी ६३९ रुग्‍ण नाशिक महापालिका क्षेत्रातील आहेत. जिल्‍हा रुग्‍णालयात सहा रुग्‍ण दिवसभरात दाखल झाले. नाशिक ग्रामीणमधील दहा रुग्‍णांचा संशयितांमध्ये समावेश होता.