नाशिक : सिंहस्थ कुंभमेळ्याच्या पार्श्वभूमीवर नाशिकला रेल्वे कोच डेपो निर्मितीसाठी रेल्वे प्रशासनाने पन्नास कोटींच्या निधीला तत्त्वतः मान्यता दिली आहे.

सिंहस्थ कुंभमेळ्यासह इतरही वेळेत रेल्वेच्या कोचची निगा राहावी, कोचची लवकरात लवकर दुरुस्ती व्हावी तसेच रेल्वे कोचचा मेंटेनन्स वेळेत आणि जलद गतीने व्हावा, यासाठी नाशिकला कोच दुरुस्ती, मेंटेनन्स डेपो उभारण्यात येणार आहे. (50 crores from Center for railway coach repair depot to Nashik)

रेल्वे कोच डेपोमुळे नाशिकच्या उद्योगात भर पडणार असून, रोजगारनिर्मितीस मोठ्या प्रमाणावर चालना मिळणार आहे. रेल्वे कोचच्या दुरुस्ती आणि मेंटेनन्ससाठी डेपोची निर्मिती व्हावी, यासाठी गेल्या काही महिन्यांपासून खासदार हेमंत गोडसे प्रयत्नशील होते.

खासदार गोडसे यांनी केंद्रीय रेल्वे राज्यमंत्री रावसाहेब दानवे यांच्यासह भुसावळ, मुंबई आणि दिल्लीस्थित रेल्वे प्रशासनाच्या अधिकाऱ्यांची भेट घेत कोच डेपोची उपयुक्तता प्रशासनाच्या निदर्शनास आणून दिली.

नाशिकला २०२७ मध्ये सिंहस्थ कुंभमेळा होत असून, त्या पार्श्वभूमीवर नाशिक येथे कोच दुरुस्ती डेपो होणे गरजेचे आहे.

कोच डेपोच्या निर्मितीची मागणी न्यायिक असल्याने विभागाने याकामी प्रस्ताव तयार करून नाशिकला कोच दुरुस्ती व मेंटेनन्स डेपोच्या निर्मितीसाठी रेल्वे प्रशासनाने पन्नास कोटींच्या निधीला तत्त्वतः मान्यता दिली.

कोच डेपोमुळ राज्यातील विविध रेल्वे मालगाड्या आणि प्रवासी रेल्वेगाड्यांच्या कोचच्या मेंटेनन्ची कामे जलद गतीने होणार आहेत.

"रेल्वे कोच दुरुस्ती व मेंटेनन्स डेपो निर्मितीच्या प्रस्तावास रेल्वे प्रशासनाने पन्नास कोटी रुपयांच्या निधीला तत्त्वतः मान्यता दिली असून, अंतिम मान्यतेसाठी प्रस्ताव लवकरच रेल्वे बोर्डाकडे सादर होणार आहे."- हेमंत गोडसे, खासदार, नाशिक