Nashik News : नांदूरमध्यमेश्वर पक्षी अभयारण्य परिसरात पक्षी पाहण्यासाठी पक्षीप्रेमी देशभरातून येतात. त्यांच्या भोजन व निवासाची व्यवस्था शेतकरी करू शकतात.

त्यासाठी अभयारण्य परिसरात शेतकऱ्यांना कृषी पर्यटन सुरू करण्यासाठी महाराष्ट्र पर्यटन विकास महामंडळाचे सहकार्य लाभेल, असे महामंडळाच्या उपसंचालक मधुमती सरदेसाई यांनी सांगितले.

नेचर क्लब ऑफ नाशिकतर्फे नांदूरमध्यमेश्वर पक्षी अभयारण्यात जास्वंद बाग या उपक्रमाचा प्रारंभ श्रीमती सरदेसाई यांच्या हस्ते पक्षी अभयारण्यात करण्यात आला, त्या वेळी त्यांनी जास्वंद बाग निर्माण केल्याने परिसरात फुलपाखरे आणि पक्ष्यांचा किलबिलाट वाढणार असल्याचे सांगितले.

संस्थेतर्फे १०० रोपांची लागवड करण्यात आली आहे. त्यांचे संवर्धन संस्थेतर्फे केले जाईल. परिसरात दोन महिन्यांत संस्थेतर्फे २०० जास्वंदाची रोपे लावण्यात येतील. राज्यातील हा पहिला प्रकल्प होत असल्याचे सांगण्यात आले.

ज्येष्ठ पक्षीमित्र दत्ताकाका उगावकर, विभागीय वनाधिकारी डॉ. सुजित नेवसे, गणेश रणदिवे, संस्थेचे अध्यक्ष प्रा. आनंद बोरा, चापडगावचे सरपंच अनिल सोनवणे, मांजरगावचे सरपंच सुनील सोनवणे, वर्किंग प्लान ऑफिसर भगवान ढाकरे, ‘लेपर्ड मॅन' उपाधी मिळालेले सुनील वाडेकर आदी उपस्थित होते.

विभागीय वनाधिकारी म्हणून पदोन्नती मिळाल्याबद्दल डॉ. नेवसे, श्री. रणदिवे यांचा सत्कार करण्यात आला.

हेही वाचा : Credit Card फसवणूक....काय घ्याल काळजी?

उपक्रमासाठी मदत करणारे गणपत हाडपे, सीमा पाटील, राहुल वडघुले, सीमा तंगनवाडे, डॉ. जयंत फुलकर, किशोर वडनेरे, मेहुल थोरात, विशाल देसले, पंकज चव्हाण, अनंत सरोदे आदींचा सत्कार झाला. प्रा. बोरा, वनपाल प्रीतिश सरोदे यांनी संवाद साधला. दर्शन गुगे यांनी आभार मानले.

वन विभागाला विनंती

पावसाळ्यात पर्यटक भटकंतीसाठी जात आहेत. वन विभागाने पर्यटकांना दोन महिने फिरण्यास बंद घातली. सरसकट बंदी घालण्याऐवजी कास पठारच्या धर्तीवर उपाययोजना केल्या जाव्यात, जेणेकरून दुर्घटना कमी होतील.

निसर्गाला हानी पोचणार नाही. पर्यटकांची संख्या वाढेल, अशी विनंती वन विभागाला करण्यात आली. त्याचवेळी संयुक्त वन व्यवस्थापन समितीतर्फे पर्यटनस्थळावर प्लास्टिक बंदी करावी, असेही सुचविण्यात आले.