Ajit Pawar News : पुणे-नाशिक द्रुतगती रेल्वेमार्गासाठी जिल्ह्यात आतापर्यंत १८ टक्के जमीन संपादित झाली आहे. उर्वरित जमिनी संपादित करण्याची जिल्हा प्रशासनाची तयारी असून, संबंधित शेतकरी देखील जमिनी देण्यास तयार आहेत.

परंतु रेल्वेमार्गाची अलाइनमेंट बदलण्याची शक्यता असून, सरकारच्या निर्देशानुसार कार्यवाही करणार असल्याची माहिती जिल्हाधिकारी जलज शर्मा यांनी दिली. (Ajit Pawar statement Possibility of changing alignment of Pune Nashik railway line nashik news)

राष्ट्रवादी काँग्रेसचे नेते तथा उपमुख्यमंत्री अजित पवार शिंदे-फडणवीस सरकारमध्ये सहभागी झाल्यानंतर नाशिक-पुणे रेल्वेमार्गाल गती मिळण्याची शक्यता व्यक्त केली जात होती. उपमुख्यमंत्री पवार यांनी मंगळवारी (ता. ८) याबाबत व्हिडिओ कॉन्फरन्सद्वारे आढावा घेतला.

जिल्हाधिकारी जलज शर्मा, महारेल, तसेच रेल्वेचे अधिकारी उपस्थित होते. नाशिक तालुक्यातील जमिनींच्या संपादनासाठी दर निश्चित झाले असले तरी ते जाहीर केलेले नाहीत. परंतु सिन्नर तालुक्यातील काही गावांमधील जमिनीचे दर जाहीर करून तेथे प्रत्यक्ष संपादनही सुरू झाले आहे.

हेही वाचा : Credit Card फसवणूक....काय घ्याल काळजी?

प्रकल्पासाठी आतापर्यंत १८ टक्के जमिनींचे संपादन झाल्याची माहिती जिल्हाधिकारी शर्मा यांनी दिली. उर्वरित जमिनी संपादित करण्याची जिल्हा प्रशासनाची तयारी असून, संबंधित शेतकरी देखील जमिनी देण्यास तयार असल्याची माहिती शर्मा यांनी दिली.

या प्रकल्पाबाबत केंद्रीय मंत्रालयाच्या स्तरावर समिती गठित होणार आहे. त्यामध्ये उपमुख्यमंत्री पवार यांचाही समावेश असणार आहे. पुणे-नाशिक लोहमार्गाची अलाइनमेंट बदलण्याची शक्यता असून, निधीचा विषयदेखील रेल्वे मंत्रालयाकडून लवकरच मार्गी लागण्याची शक्यता शर्मा यांनी व्यक्त केली.