ताहाराबाद (जि. नाशिक) : बागलाण तालुक्यातील अंतापूर-दसवेल रस्त्यावरील अंतापूर गावाजवळून जाणाऱ्या रस्त्याची मोठ्या प्रमाणावर दुरवस्था झाली असून, यामुळे वाहनधारक व दावल मलिकबाबा यांच्या मंदिरात येणाऱ्या हजारो भाविकांची मोठी अडचण निर्माण होत असल्याने रस्त्याची त्वरित दुरुस्ती करण्यात यावी, अशी मागणी होत आहे. (Anantapur road in bad condition demand for repair Nashik Latest marathi news)

अंतापूर येथील दावल मलिकबाबा देवस्थान येथे दर गुरुवारी मोठा यात्रोत्सव साजरा होतो. यानिमित्त हजारो भाविक येथे हजेरी लावतात. मात्र अंतापूर गावातून दसवेलकडे जाणारा रस्ता दावल मलिकबाबा देवस्थानकडे जाण्यासाठी वापरला जातो.

या रस्त्याची दयनीय अवस्था झाली आहे. गटारी नसल्याने रस्त्यावर नेहमी सांडपाणी वाहते. परिणामी रस्त्यावर चिखलाचे साम्राज्य असते. रस्त्यावरून वाहनधारकांना वाहने चालविणे जिकिरीचे होतेच पण यात्रेकरू व ग्रामस्थ यांनाही पायी चालणे अवघड बनते. रस्त्याच्या समस्येमुळे ग्रामस्थ, यात्रेकरू वैतागले आहेत. रस्त्याची त्वरित दुरुस्ती करण्यात यावी, अशी मागणी होत आहे.

मोसम नदीवर असलेल्या पुलाची गेल्या तीन वर्षांपूर्वी आलेल्या पुरात मोठी पडझड झाली होती. मात्र यंदा नदीला आलेल्या पुरामुळे पुन्हा धोका निर्माण होण्याची शक्यता असल्याने वाहतूक बंद ठेवण्यात आली होती. यात्रेकरूंची वाढती संख्या बघता या ठिकाणी पुलाची त्वरित दुरुस्ती होणे आवश्यक आहे.

"महाराष्ट्रात प्रख्यात असलेले दावल मलिकबाबा यांचे देवस्थानावर प्रत्येक गुरुवारी हजारो भाविक येऊन नतमस्तक होतात. येणाऱ्या भाविकांना रस्त्याचा वापर करावा लागत असल्याने त्यांची मोठी अडचण होते. त्यामुळे संबंधित रस्त्याची व पुलाची त्वरित दुरुस्ती होणे गरजेचे बनले आहे. " -सचिन कोठावदे, जिल्हाध्यक्ष- नाशिक जिल्हा काँग्रेस (ओबीसी विभाग)