नाशिक : कोरोना (Corona) चौथ्या लाटेची शक्यता व्यक्त केली जात असताना महापालिकेच्या वैद्यकीय विभागाने तिसऱ्या लाटेचा (Third wave) प्रभाव ओसरत असताना कोविड सेंटर (Covid Centre) बंद करण्याबरोबरच आता सेंटर्स मधील बेड, गाद्या आदी प्रकारच्या साहित्याचा लिलाव (Auction) करण्याचा निर्णय घेतला आहे.

युरोपियन देश करताहेत चौथ्या लाटेचा सामना

कोरोना तीन लाटांमध्ये शहरात दोन लाख ७२ हजार ७२३ रुग्ण आढळून आले, तर आतापर्यंत ४,१०५ नागरिकांचा कोरोनामुळे मृत्यू झाला आहे. कोरोना तिसरी लाट फारशी परिणामकारक ठरली नाही. विशेष म्हणजे बिटको रुग्णालयात चार, तर झाकिर हुसेन रुग्णालयात एक रुग्ण उपचार घेत आहे. शहरात शंभर ॲक्टिव्ह रुग्ण असून, लाट ओसरत असल्याचे संकेत मानले जात आहे. वैद्यकीय विभागाने बिटको व झाकिर हुसेन रुग्णालयांना सामान्य रुग्णालय घोषित करण्याची तयारी केली आहे. समाजकल्याण वसतिगृह बंद करण्यात आले. १४ मार्चला मीनाताई ठाकरे स्टेडिअम व ठक्कर डोम कोव्हिड सेंटर बंद केले जाणार आहे, तर मेरी कोव्हिड सेंटर इमारत हस्तांतरित केली जाणार आहे.

कोरोना चौथी लाट येण्याची शक्यता आहे. युरोपियन देश चौथ्या लाटेचा सामना करत असताना देशात चौथी लाट येणारच नाही, असे समजून प्रशासनाकडून साहित्याचा लिलाव होत असल्याने आश्‍चर्य व्यक्त केले जात आहे.