Nashik Fraud Crime : बनावट डिमांड ड्राफ्ट तयार करून ॲक्सिस बँकेच्या येथील शाखेला साडेतीन कोटी रुपयांचा गंडा घातला आहे.

झटपट श्रीमंतच्या होण्याच्या नादात ए. के. ट्रेंडीगचा मालक अनिकेत श्रीनिवास मुंदडा (रा. पिंपळगाव बसवंत) याने साडेतीन कोटीचा बँक घोटाळा केला आहे. (Axis Bank cheated 3 crore by making fake demand draft nashik fraud crime news)

बनावट डिमांड ड्राफ्टच्या आधारावर साडेतीन कोटी रुपये घेऊन मुंदडा फरारी झाला आहे. यामुळे पिंपळगावच्या बँकिंग क्षेत्रात खळबळ उडाली आहे. ए. के. ट्रेडींगच्या माध्यमातून व्यवसाय करणारा अनिकेत मुंदडा व त्याचे साथीदार राजू, मथुराज, विश्‍वास यांनी आठ दिवसांपूर्वी बनावट डिमांड ड्राफ्ट तयार केला.

पिंपळगावच्या महामार्गावरील ॲक्सिस बँकेत डिमांड ड्राॅफ्टच्या सहाय्याने साडेतीन कोटी रुपये काढून पोबारा केला. मुंदडा व त्यांच्या टोळीने दिलेला त्याच क्रमांकाचा डिमांड ड्रॉफ्ट बंगळुरुच्या शाखेत सादर केला. त्यावेळी हा घोटाळा बँक अधिकारी व कर्मचाऱ्यांच्या लक्षात आला.मुंदडा याची पाश्‍र्वभूमी ठकबाज अशीच आहे.

झटपट श्रीमंतीच्या नादात त्याने बँकेला गंडा घातला आहे. संशयित फरारी झाले आहेत. ॲक्सिस बँकेचे शाखा व्यवस्थापक नितीन राजेंद्रनाथ बाली यांनी यांनी दिलेल्या फिर्यादीवरून मुंदडा व त्याच्या तीन साथीदारांविरोधात पिंपळगाव पोलिस ठाण्यात फसवणुकीचा गुन्हा दाखल झाला आहे. पोलिस निरीक्षक दुर्गेश तिवारी यांच्या मार्गदर्शनाखाली तपास सुरू आहे.