नाशिक : भारतीय संस्कृती ज्या पद्धतीने महान आहे, त्याचप्रमाणे नाट्य परंपरादेखील इतिहासकालीन असल्याचे वास्तव मांडणारे विश्वामित्र हे नाटक सादर झाले. निमित्त होते, भारत रंग महोत्सवाचे. (Bharati Rang Mahotsav Vishwamitra tells history of theater tradition art play drama nashik news)

महाकवी कालिदास कलामंदिर येथे नॅशनल स्कूल ऑफ ड्रामातर्फे सुरू असलेल्या भारंगममध्ये सोमवारी (ता. २०) विश्वामित्र हे नाटक सादर झाले. ब्रिजेश के वर्मन यांच्या कादंबरीवर आधारित असलेले हे हिंदी नाटक प्रा. अफसर हुसेन यांनी लिहिले आहे.

विजयकुमार नाईक यांनी मराठी अनुवाद केला आहे. अभिनय, संगीत, गीत, मंचाची सुरेख रचना, वेशभूषा यातून शास्त्रीय नाट्याची आठवण प्रकर्षाने होते. विश्वामित्राची भूमिका दीपक अमोणकर यांनी साकारली आहे.

तर, इंद्र म्हणून सतीश नार्वेकर, मेनका व तडका यांची भूमिका वैशाली पाईककोडे यांनी आपल्या भूमिकेला योग्य न्याय दिला आहे. इतिहासकालीन नाट्याची साक्ष देणाऱ्या या नाटकाद्वारे भारतीय परंपरा व नाट्य कला हीदेखील प्राचीन असल्याचे सुंदर वर्णन करण्यात आले आहे.

दोन तासांच्या नाटकात पूर्वार्ध व उत्तरार्ध अशा स्वरूपात नाटकाची मांडणी करण्यात आली आहे. प्रसाद कलंगुटकर यांनी लाइट डिझाइन केले. तर, योगेश कापडी यांनी सेट डिझाईन केले आहे. संगीत, मेकअपची योग्य सांगड घातल्यामुळे प्रेक्षकांना खेळवून ठेवण्यात दिग्दर्शकांना यश प्राप्त झाले.