Nashik News : मऱ्हळ खुर्द (ता. सिन्नर) येथे दैनंदिन कामासाठी ग्रामसेवक उपलब्ध होत नसल्याच्या तक्रारी आहेत.

ग्रामीण भागातील विकासासाठी शासनातर्फे नेहमीच प्राधान्य दिले जाते, त्या दृष्टीने गावातील ग्रामपंचायतींना मोठ्या प्रमाणात निधीदेखील उपलब्ध करून दिला जातो. (Complaints about Village Sevaka in Marhal Nashik News)

ग्रामपंचायतीचा कारभार पाहण्यासाठी प्रशासनाकडून ग्रामसेवक हा महत्त्वाचा मानला जातो. परंतु बऱ्याच ठिकाणी ग्रामसेवकांचे ग्रामपंचायतीकडे दुर्लक्ष होते आणि गावातील नागरिकांना योजनेपासून वंचित राहावे लागते.

असाच एक प्रकार सिन्नर तालुक्यातील मऱ्हळ खुर्द-बुद्रुक या ग्रामपंचायतीमध्ये सुरू आहे, अशी तक्रार आहे. तेथील ग्रामसेविका काही महिन्यांपासून गावात फिरकलेल्या नसल्याचा आरोप नागरिकांनी केला आहे.

हेही वाचा : Credit Card फसवणूक....काय घ्याल काळजी?

ग्रामपंचायतमध्ये ग्रामसभा नाही, ग्रामपंचायत निधीचा व इतर कोणत्याही प्रकारची माहिती नागरिकांना मिळत नाही, योजनांविषयी विचारायला गेल्यावर दमदाटी करतात अशा अनेक प्रकारच्या तक्रारी ग्रामस्थांच्या आहेत.

ग्रामस्थांनी अनेक वेळा गटविकास अधिकारी, विस्ताराधिकारी यांना याबाबत निवेदन देऊन दखल घेतली जात नाही.

योजनेपासून व कामकाजापासून पूर्ण ग्रामपंचायत वंचित असून, शासनाने तत्काळ लक्ष घालून कारवाई करण्याची मागणी ग्रामस्थांनी केली आहे.