Nandur Madhyameshwar Dam : जिल्ह्याच्या पश्चिम पट्ट्यात सुरू असलेल्या संततधारेमुळे नांदूरमध्यमेश्‍वर धरणातील साठा वाढला असून, मंगळवारी (ता. २५) दुपारी साडेचारच्या सुमारास धरणातून सात हजार १९० क्यूसेक्स वेगाने विसर्ग गोदावरी पात्रात सुरू करण्यात आला आहे.

त्यामुळे गोदावरीचे पात्र खळखळल्याचे चित्र पाहायला मिळाले. (Discharge of 7 thousand 190 cusecs from Nandur Madhyameshwar Dam nashik news)

दारणा धरण क्षेत्राच्या पाणलोट क्षेत्रात होत असलेल्या पावसामुळे मंगळवारी निफाड तालुक्यातील नांदूरमध्यमेश्वर धरणातून विसर्ग करण्यात आला.

जिल्ह्यातील पश्चिम भागातील इगतपुरी, त्र्यंबकेश्वर, नाशिक तालुक्यांत झालेल्या पावसामुळे गोदावरी नदीला पाणी आल्याने नांदूरमध्यमेश्‍वर धरणातून गोदावरी नदीत ‘जायकवाडी’च्या दिशेने सात हजार १९० क्यूसेक्स पाण्याचा विसर्ग सुरू आहे.

हेही वाचा : Credit Card फसवणूक....काय घ्याल काळजी?

यामुळे नांदूरमध्यमेश्वर धरणाखालच्या कोरड्या असलेल्या बंधाऱ्यांना संजीवनीच मिळेल. दरम्यान, गेल्या काही दिवसांपासून दडी मारलेल्या पावसाचे निफाड तालुक्यात सर्वत्र पुनरागमन झाले आहे. यामुळे मका, सोयाबीनसह पिकांना फायदा होईल.

तालुक्यात जवळपास सर्वच भागांत दमदार पावसाची प्रतीक्षा आहे. अनेक ठिकाणी चांगला पाऊस व्हावा, यासाठी बळीराजा आकाशाकडे डोळे लावून उभा आहे.