सिडको (नाशिक) : येथील दुय्यम निबंधक कार्यालय क्रमांक ७ मध्ये गुरुवारी (ता. १०) सायंकाळी दोन जणांची हाणामारी झाल्याची घटना घडली आहे. यासंदर्भात प्रत्यक्षदर्शीनी दिलेल्या माहितीनुसार खरेदी-विक्री व्यवहारात दलाली करणाऱ्या एका दलालाकडून वकिलांच्या प्रतिनिधीला जबर मारहाण करण्यात आली.

सर्वसामान्य ग्राहक आणि दलाल यांच्यात नेहमीच होतात वाद

यात संबंधित रक्तबंबाळ झाल्याचे प्रत्यक्षदर्शीनी सांगितले. सदर दलाली काम करणारी व्यक्ती सिडको कार्यालयाचा निवृत्त कर्मचारी असल्याचेही समजते. या कार्यालयात नेहमी भरमसाट गर्दी असल्याने कुठल्याही प्रकारचा सामाजिक अंतर, तसेच मास्कचा वापर होत नसल्याने या ठिकाणी नियमांचा फज्जा उडताना दिसत आहे. दुय्यम निबंधक कार्यालयात सर्वसामान्यांना वेगळी वागणूक, तर दलालांना स्पेशल वागणूक दिली जाते. यावर तेथील अधिकाऱ्यांचा अजिबात वचक नसल्याचे दिसून येते. त्यामुळे दलाल व सर्वसामान्य ग्राहक यांच्यामध्ये नेहमीच वाद होताना दिसतात. येथे मोठ्या प्रमाणात टेबलाखालून आर्थिक व्यवहार होत असल्याचेदेखील चर्चेला आता तोंड फुटले आहे. याबाबत वरिष्ठांनी वेळीच दखल घेणे आवश्यक आहे. अन्यथा हा दलालांचा अड्डा झाल्याशिवाय राहणार नाही. यात तिळमात्र शंका नाही.