Nashik MSEB News : ग्राहकांना बिलाचा भरणा करणे अधिक सुलभ व्हावे, यासाठी ३० व ३१ डिसेंबर या साप्ताहिक सुटीच्या दिवशीही वीजबिल भरणा केंद्र सुरू ठेवण्याचे निर्देश नाशिक परिमंडळाचे मुख्य अभियंता दीपक कुमठेकर यांनी दिले आहेत.

त्यानुसार नाशिक परिमंडलांतर्गत नाशिक जिल्ह्यातील महावितरणचे सर्व अधिकृत वीजबिल भरणा केंद्र शनिवार आणि रविवार या सुटीच्या दिवशी सुरु राहतील.(Electricity bill payment center open even on holidays nashik mseb news)

उपलब्ध सुविधेसह डिजिटल माध्यमातून ग्राहकांनी आपल्या चालू व थकीत वीजबिलाचा भरणा करून सहकार्य करण्याचे आवाहन महावितरणकडून करण्यात येत आहे. ग्राहकांच्या सोयीसाठी वीजबिल भरणा केंद्र सुरू ठेवण्यासोबतच थकीत वीजबिल वसुलीसाठी कारवाई सुटीच्या दिवशी सुरू राहणार आहे. थकबाकीदार ग्राहकांनी वीजपुरवठा खंडित होण्याची कटू कारवाई टाळण्यासाठी आपल्या बिलाचा भरणा वेळेत करावा.

अधिकृत वीजबिल भरणा केंद्राशिवाय महावितरणच्या मोबाईल ॲपवर बिल भरणा तसेच इतर सर्व सुविधा हाताच्या बोटावर उपलब्ध आहेत. www.mahadiscom.in या संकेतस्थळावर केवळ बारा अंकी ग्राहक क्रमांक नमूद करून नेट बँकिंग, डेबिट किंवा क्रेडिट कार्ड आदींच्या माध्यमातून बिल भरता येते.

याशिवाय बाजारात उपलब्ध असलेल्या विविध पेमेंट वॉलेटचा उपयोग करून घरबसल्या बिलाचा ऑनलाइन भरणा करण्याची सुविधा आहे. तसेच बिलावर दिलेला क्यूआर कोड स्कॅन करूनही थेट पेमेंट गेटवेवर जाऊन वीजबिल भरणे सुलभ होते, या डिजिटल माध्यमांचा वापर करून घरबसल्या वीजबिल भरता येईल. अखंडित वीज सेवेसाठी उपलब्ध सुविधांचा उपयोग करून चालू व थकीत वीजबिलाचा भरणा करावा, असे आवाहन करण्यात आले आहे.