नाशिक : शहर व जिल्ह्यात अद्यापही म्हणावा तशा पावसाला सुरवात झालेली नाही. पुढील काही दिवसामध्ये मॉन्सून लांबल्यास शहरावर पाणीकपातीचे ढग आहे. कारण गंगापूर धरणामध्ये केवळ २९, तर धरण समूहामध्ये २५ टक्के पाणीसाठा शिल्लक राहिला आहे.

नाशिक शहराला गंगापूर धरणसमूह, दारणा धरण (चेहेडी बंधारा) व मुकणे धरणातून शहराला पाणीपुरवठा केला जातो. परंतु, चालू मॉन्सून हंगामामध्ये पावसाळा लांबल्याने गंगापूर धरणातील पाणीसाठा कमी होत आहे.

गेल्यावर्षीच्या तुलनेत गंगापूर धरणात अखेर २९ टक्के पाणीसाठा शिल्लक आहे. तर, समूह धरणांमध्ये २५ टक्केच पाणीसाठा उरला आहे. त्यामुळे ऐन पावसाळ्यात नाशिककरांना पाणीकपातीला सामोरे जावे लागण्याची शक्यता निर्माण झाली आहे.

गेल्यावर्षी गंगापूर धरणात ४० टक्के, तर समूहामध्ये २९ टक्के पाणीसाठा शिल्लक होता. असे असतानादेखील महापालिकेकडून आठवड्यातून एक दिवस पाणीकपातीची घोषणादेखील केली होती. मात्र, त्यानंतर दमदार पाऊस झाल्याने ही कपात टळली होती. धरणातील पाणीसाठा लक्षात घेता महापालिकेकडून यापूर्वीच नागरिकांना पाणी जपून वापरण्याचे आवाहन करण्यात आलेले आहे. जर पुढील काही दिवसांमध्ये धरण क्षेत्रात चांगला पाऊस न झाल्यास प्रशासनावर पाणी कपातीचा निर्णय घेण्याची वेळ येणार आहे.

धरण चालू साठा (टक्केवारीत) मागील साठा

गंगापूर २९ - ४०

कश्‍यपी १७ - १७

गौतमी १६ - ३१

आळंदी ०३ - १०

पालखेड धरण समूह

दारणा १९ - २६

मुकणे ३६ - २२